La Usc di Ladins

Ci che tröpes dites á bele fat de süa buna, vëgn sëgn comané da n decret dl Presidënt dla Provinzia de Südtirol Arno Kompatscher: düc i cantiers che ne mëss nia ester mëss gní stlüc. Kompatscher motivëia insciö: "Al ne pó nia ester che nos porvun sciöche sozieté da smendrí a n minim la vita publica y economica, y tl medem tëmp él imprejes y porsones privates che dezipa chisc sforc y traverc." Cun le decret de prescia nen vára da archité döt ci che ne mëss nia ester.
Na ezeziun vëgnel fat por i laurs che vá assolutamënter debojëgn, por garantí sorvisc de basa por la popolaziun o por assiguré jö cantiers. Te chi caji él a vigni moda da tigní ite les regoles de comportamënt scrites dant, y al ne pó nia ester söl cantier plü co 5 colaboradus.
Na prezisaziun vëgn ince fata por l’alberch de personal sanitar. Chësc pó inant gní ospité te eserzizi d’alberch, mo chisc mëss ester stlüt al publich.

I foresć mëss jí a ciasa
Le Presidënt dla Provinzia i fej ince n apel por les porsones che n’é nia residëntes tl Südtirol, en gran pert che á chiló secundes ciases: chëstes dess jí zoruch a ciasa, por sconé la sanité y ne pesé nia sön le sistem sanitar local, che á bele insciö sot a sforz. "Dötes chëstes porsones n’á chiló degun dotur de ciasa y te chësta situaziun á i doturs de ciasa na funziun ciamó plü importanta co zënza", dij Kompatscher.  (pablo)