La Usc di Ladins

I podun la rodé desche i orun en cunt de chësta pandemia, danter speculaziuns y bagatelisaziuns, danter seriosité scientifica y rigorosité zivila, n fat él che ara é tl laur da mudé döt le monn. Al é por püch da ti trá dant ala politica y ai media che ai somëna tëma, y i lasciun da le fá al plü tert canche i ún porsones te fami­lia y/o te ciasa detlarades en carantena o infetades dal Covid-19.
Instës, che i viri da su te ciasa y laori ince chiló da döes edemes incá, vëighi ci ütl che les tecnologies modernes á, por lauré y fá ia i scüfs privac, mo dantadöt por comuniché cun i atri. I ne sun nia bogn da vire zënza sozieté, zënza i atri, y te chëstes edemes de »iöstáaciasa« él essenzial y nezesciar da avëi i stromënc sciöche computer, fonin, radio y televijiun da tó ca. Y i ponsun sciöche püc iadi denant ci che al ó dí da avëi la forza eletrica y l'internet te nostes ciases. I ne sá nia ci che i fajess, sce i ne podess chisc dis nia telefoné, m'la cunté söi socials cun i atri, avëi contat sön Skype cun porsones che vir dalunc geograficamënter mo daimpró, ajache ares sint incër ëres ia y ince te so ce la tëma dal piec!
Degügn ne sá al momënt ci che al suzedará ciamó y tan di che chësc suzedará... I savun che tan atira ne podarunse nia jí fora de ciasa desche i sun ausá da na vita, incunté jënt, ti toché la man, damané desche ara ti vá. Ponsan a chësta taia lungia y crödia che i odun dan nos cun i edli döt ater co ligherzins, nes confortunse bele düc sotman al de te chël che al vëgn anunzié che i podun indó jí al'aria y te paisc, olache l'ostaria sot dlijia á mefodër daurí les portes y taché ite la mascin dal café! En chël de daral sorëdl ince sce al ploiará, en chël de saludará düc düc y canche les ciampanes da ciampaní jö sonará adöm por jí ala santa mëssa podaral ester assá che i jarunse düc ion – ajache do ne avëi albü por tan de edemes degöna mëssa arunse vëia y ligrëza da perié y cianté deboriada la »festa dla vita«. Magari saral avisa chi dis Pasca, o püch do Pasca, do la »via crucis« y cun la ressoreziun!  (de Iaco Rigo)