La Usc di Ladins

Anter i fac e i avenimenc grieves e ries de chest temp l’é ence na bela neva che volon meter al luster. Se trata de n bel projet de teater interladin nasciù da l’amicizia anter doi atores: David Dorich da Fascia e Simon Kostner da la Val Badia.

Na dì, amò chest uton passà, i se à troà e i se à pissà che fossa stat bel meter ensema n toch de teater sul tormen Vaia e sun sia conseguenzes te noscia valèdes.

»Na bela dì Simon me met dant soa idea - disc David - fossane doventé doi albres che se conta chel che i à vivù endana l tormen. E gio ge é dit che me aessa piajù far ence n viac tel temp e tirar cà duc i evenc storiches mìngol più emportanc dal 1800 fin aldidanché. Dita e fata… Da chi podaane pa jir a se far didar a meter jù l test? Ge aon domanà didament a Vigilio Iori che l’à amò lurà ence con Simon: el se à metù a scriver jù l test e gio e Simon sion jic sun paladina a emprovisar e far mena de esser doi albres. Coscita l’é vegnù fora che gio aesse podù far n alber fascian e el n alber badiot che i se troa te na sia fora per l’Austria. Endana che noi se conton sù i avenimenc del passà vegn fora cater personajes che ne fasc viver endodanef che che l’é sozedù te chel moment de nosc viac.«

De più su La Usc stampèda de vender ai 20 de mèrz 2020.  (Monica Cigolla)