La Usc di Ladins

I mascheroc che an ciafa chisc dis é desferënc por materiai, fatëza y funziun. Danfora él da savëi che che adora i mascheroc, y por ci mistiers, sorvisc y laurs.

Les sorts de mascheroc

1) I mascheroc fac y arjigná a ciasa
An i dij ince "mascheroc chirurgics", chi che döta la jënt pó tó por rodé (aladó dles desposiziuns varëntes) y jí a lauré (aladó dles desposiziuns varëntes). Chisc scona la porsona da gotes che é tl’aria do na tossida o stranudada de zacai che porta virus, a na destanza cina 2 metri. Sce an mëss baié cun porsones fora de isolamënt sforzé, familia o ciasa, él da porté n te’ mascherot, o ince ma – en sostituziun – n "fazorel

colar" trat sö cina sura le nes o na bona sćiarpa che cür bocia y nes, y tigní les destanzes scrites dant de almanco 1 meter. Sce an é da susc, y canche an é da susc, n’él por nia da avëi le mascherot o le fazorel colar.

2) I mascheroc de proteziun
I mius mascheroc porta tl jargon profescional l’inom FFP3 ("filtering facepiece"), ai á n ventil de espiraziun y garantësc n livel alt de proteziun. Dungia a chisc FFP3 él da anunzié i mascheroc FFP2, che n’á nia le ventil mo garantësc n livel dër alt de sconanza. Chësc secundo model "2" vëgn adoré scialdi dai colaboradus dl Pröm Aiüt, dles Ambulanzes y dal personal dles ciases de cura y assistënza sanitara.

Les manëces

Ince manëces dëida sconé dal’infeziun di virus, y chisc dis dantadöt dl coronavirus. Important él chiló da savei:
les manëces scona, mo ne tol nia demez le dovëi da garantí personalmënter l’igiena dles mans. Les mans mëss gní lavades bun y sot almanco dui menüc.
Les manëces mono-usus mëss gní sciurades demez do che an les á albüdes por jí a cumpré ite y fá val’ ater laur prigorus por na infeziun.
Les manëces mëss gní portades da plü figöres profesacionales, desco personal de netijia, de gastronomia y de botëghes de alimentars. Sambëgn á ince le personal soziosanitar y che socodësc porsones püres tles ciases y ti spitoi les manëces indos.

 (Iaco Rigo)