"Che la pandemia posse passé!"

Data

26 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N vënderdì nvieia Papa Francësch duc y dutes a perië deberieda Chël Bel Die de fé passé la pandemia dl coronavirus. L unirà nce dat la benedescion Urbi et Orbi y la ndulgënza plenaria.

Da coche spiega Sn. Digan de Gherdëina Vijo Pitscheider va l Papa Francësch n vënderdi ai 27 de merz  dala sies da sëira sun Plaza de San Piere, che sarà ueta.

L va a aduré, deberieda cun i fediei te si cëses, l Santiscimo Sacramënt, y a perië Chël Bel Die de fé passé la pandemia dl coronavirus.

Oradechël dajerà Papa Francësch la benedescion "Urbi et Orbi", ala zità y al mond, ulache n possa avëi la ndulgënza plenaria. Sn. Vijo: "Per avëi chëla messons se pentì sce on fat zeche de mel, perië per la misericordia de Die y nce perië che l nes vënie lascià do i picëi y nce la straufonga determineda dai picëi."

La adurazion y la benedescion ie sambën da udëi tla televijion, danter l auter sun RAI 1 dala 17.50 inant

Ti media talians vëniel rujenà de "ndulgënza plenaria", te chëi tudësc de "assoluzion generela". L semea vester n pitl fal de traduzion. Da coche stlarësc Sn. Vijo iel na desferënzia danter la doi cosses. "Assoluzion generela" uel dì che l vën perdunà duc i picëi zënza messëi jì a pista, pra la "ndulgënza plenaria" vëniel perdunà i picëi, oradechël vën nce l castighe che vën ora dal picià lascià do. L toma, nsciuma, demez l Purgatuere, sce n uel l tré adum n curt. Aldò dla dizion taliana, che Sn, Vijo rata vester la drëta, uniràl dat na ndulgënza plenaria.

La ndulgënza plenaria ie na pratica antica de urazion y penitënza per la remiscion dla punizion temporela che na persona muessa avëi per i picëi che ti ie unii perdunei. Tl nseniamënt catolich possa na persona se tò pea i meric de Gejù y di Sanc per se damandé la ndulgënza y la dunfrì nce per cont de zachei che ie mort.

David Lardschneider

Foto: Papa Francësch (foto de Gabriel Andrés Trujillo Escobedo – https://commons.wikimedia.org).

Galaria retrac