La Usc di Ladins

Papa Francësch se damanda che la pandemia dl coronavirus posse tosc finé: "Cun Die sun la berca ne jons nia sot! - Son jic inant massa aslune, abrei de davani. - L ie te chësc mumënt che messon crì ora cieche conta per nëus, de cieche on propi debujën y de cie nia, la va de jì de viers dl Seniëur."

La funzion à scumencià dala sies da sëira a San Piere, n vënderdi ai 27 de merz, sot ala plueia.

Danora iel unì liet l Vaniele, cun la storia di apostuli che fova sun la berca, ntan che l fova n gran vënt y tampesta. I apostuli ova tëma, nce ajache Gejù durmiva. "Ne te mpòrtel pa nia de nëus?" ti damanda i discepuli. Gejù archieta vënt y tampesta, y ti damanda ai apostuli: "Ciuldì ëis’a tëma, ne ëis’a nia plu fede?"

Papa Francësch à te si pensieres auzà ora nosta fauza segurëzes, nosta ajëndes plëines, nosta manieres de vita y la priuriteies che on abù. On lascià demez chël che ti dà veramëter forza a nosta vita y a nosta cumenanza.

La tampesta nes dà da lecurdé coche on anestetisà dut cant, zënza se lecurdé de nosta ravises, dla storia de nosc antenac.
Cun la tampesta toma la mascra de nosc ego y de nosc stereotip de vita. On udù che pudon mé viver tla cumenanza, coche fredesc y surans.

"Ciuldì ëis’a tëma: ne ëis’a nia fede?"
La parola de Gejù nes toca duc: son jic inant massa aslune, abrei de davani. Ne on nia fermà vieres y iniustizies, ne on nia scutà su i pueresc, ne on nia cialà dl planët amalà, nëus minan de vester sannynton, canche l mond fova y ie amalà.
L ie te chësc mumënt che messon crì ora cieche conta per nëus, de cieche on propi debujën y de cie nia, la va de jì de viers dl Seniëur.

Truep cumpanies à dat si vita, nce te tëmp de tëma. L spirt ie bon de rescaté y de re-valorisé la segurëza che nosta vita ie sustenida dala jënt normala, nia da chiche ie pumpà su ti media. Nosta vita ie sustenida da chiche scrij iusta n capitul dezijif de nosta vita: dutores y nfermieres, chiche lëura tla butëighes, la badantes, i autotrasportadëures, i prevesc y la munighes, duc chëi che lëura inant per nëus, duc i ulenteres.


"Deguni ne se selva mé tres y cun sé nstës!"
Inant à dit l Papa che on udù te chisc dis nce la mpurtanza di genitores, de chëi de familia, de l’ava y nëine, di nsenianc, che ti à dat inant a si mutans y a si mutons l nseniamënt de coche n possa jì inant te na tel situazion de crisa, nce cun la urazion.

Trueps à perià, te chësta enes, da coche à lecurdà l Papa: la urazion y l servisc bel achiet via de chiche lëura per nëus ie states y ie la ermes che nes juda a vëncer.

Ne pudon nia viver da sëui, on debujën de Chël Bel Die sciche pra la stëiles che mëina la berca. Cun ël sun la berca ne jons nia sot. La forza de Die ie chël de purté al bën dut chël che fej pert de nëus, l bon ma nce l stlet. Cun Die sun la berca ne jons nia sot.

L semea iusta bën che duc, che dut vede sot. Ma l Seniëur ie sciche Gejù che se descëida, on na ancora, tres la crëusc unions salvei, tres la crëusc pudons re-scaté y se descedé y se salvé.

Te nosta ijulazion iel unì fat l’anunzia che nes selva: Gejù ie ressuscità y viv dlongia nëus.

Ne lascion nia destudé la pitla flama de fede che ie mo te nëus, ma ulon che la speranza mpeie inò su l fuech.


Perion Chël Bel Die che l tole ite duta la cuntrarietà nosta, chëla dl pudëi y dla uniputënza. Mé l spirt possa nes dé forza, per vester inò boni de udëi ite la mpurtanza dla uspitalità, fraternità y solidarietà.
Tla crëusc ons speranza: ëila sustën duta la mesures per la streda sun chëla che on messù y messon jì inant.

Papa Francësch: "La fede ie dëibla y on tëma. Ne nes lascé nia tla tëma. Coche San Piere ova fat sun la berca, ulons nce nëus tré demez uni festide, ajache savon che Die cëla de nëus!"

Nscila l ntervënt dl Papa, che à damandà la interzescion dla Madona y de Chël Bel Die, acioche la pandemia posse passé.

Duc chiche ulova à giapà la ndulgënza plenaria.

L Papa à ala fin dat la benedescion "Urbi et Orbi", ntan che l sunova la ciampanes. Y ntan che l jiva la sirenes.

David Lardschneider


Foto: Papa Francësch.