La Usc di Ladins

Le presidënt dla Provinzia Arno Kompatscher é tl laur da firmé le Decret nü dles prescriziuns y restriziuns por i efec dla pandemia dl coronavirus CHE DORARÁ CINA ai 13 d’auri 2020 inclusif (Lönesc de Pasca) – chësc ál dit sëgn tla videoconferënza stampa. Te chësc decret gnaral ince baié che i geniturs (y nia "ma" un n genitur !) cun sü mituns pó fora de ciasa, mo tres restan tles vijinanzes dl’abitaziun.
Lapró prevëiga le decret ince la poscibilité por impresars individuai y dites familiares da lauré te süa sënta prinzipala ("i titolars y sü convivënc pó lauré te süa aziënda, ince sce ara é dainciará da söa ciasa" – insciö Kompatscher) tan inant che ai ne röia nia en contat cun tliënc y fornidus (preodü n’él nia por les dites y i artejans che ne fej nia laurs NEZESCIARS da podëi jí a lauré dai tliënc o sön cantiers).
Chësc, por arjigné ca plan plan la daurida dl'ativité di artejans fora de süa sënta y söi cantiers – insciö Kompatscher.

Les ultimes zifres de Südtirol
Indöt él gnü fat cina sëgn 12.682 tests PCR sön 7.082 porsones, ma inier al 1. d’aurí indöt 724.
45 porsones é resultades positives tles ultimes 24 ores.
Indöt resultëia 1.443 porsones atocades da na infeziun de coronavirus.
I varis dala maratia é 165.
251 amará vëgn curá te staziuns de ospedai.
54 é i paziënc Covid-19 ti reparc de intensif.
11 é i paziënc Covid-19 de Südtirol te spitoi d’Austria y dla Germania.
75 porsones é te spitoi cun sospet de COvid-19.
128 é i morc cun/de Covid-19 de Südtirol cina sëgn, de chisc 84 te spitol y 44 te ciases de palsa.
161 é i colaboradus dl’Aziënda sanitara positifs al test.
I doturs de medejina generala y pediatri positifs é 12.

La carantena
3.205 porsones é atualmënter tla carantena obligada o te isolamënt te ciasa. 1.961 é les porsones che á stlüt jö la carantena y l’isolamënt domiziliar. Cina incö é indöt 5.166 i zitadins atocá da mosöres de carantena (passades o tres ciamó en at).

 (Iaco Rigo)