La Usc di Ladins

Per egn, da canche l Comprenjorie Ladin de Fascia à tacà a envièr via l sistem de regoeta desferenzièda, l’é stat registrà con sodesfazion n smaorament de la perzentuèla de reziclaje e i sentadins de Fascia an dò an se desmostrèa ‘virtuousc’ tel desferenzièr e spartir fora l refudam che podea vegnir reziclà, l trajan demez te la vida dreta.

Ampò te l’ultim temp somea che chesta tendenza sie jita de zeruch, e che i sentadins fascegn i sie semper manco ascorc e responsdaboi.

L responsabol del Servije de igiene urbèna e ambientèla del Comun general de Fascia, Stojan Deville, ne à dit che l problem revèrda tant l conferiment ti Zentres de regoeta di materièi che chel te la ìsola ecologiches.

Ti Zentres de regoeta l’é jent che porta e trèsc tel post resservà ai refudames encompres de gregn sac o cartons olache l’é ite dedut, per no aer brea de spartir o con l’idea de sparagnèr. Ma l refudam encomper vegn portà a Trent te na desćèria olache i laora demò chela sort de roba grana e da chesta desćèria l’é ruà osservazions che l’é ite roba che cognessa jir te la brujadoa jun Busan.

Ence te la isoles ecologiches anter la plastica l’é ite n muie de roba che no va ben: se pel trèr ite demò la embaladures, donca demò chel che serf a tegnir ite n prodot, ma che no vegn durà. Se tropes i trasc refudam olache no ge volessa l’é pericol che no i ne tole più ite l material da reziclèr e che cognassane portèr dut te la brujadoa. A chesta vida se podessa ruèr a smaorèr la speises per la desgorta del 20% per duc i sentadins.


De più su La usc stampèda de vender ai 22 de mé 2020.

 (Lucia Gross)