»Birba« é ince online

Data

03 de jugn 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’otava ediziun de »Birba« é danman. La revista por scolares y scolars de cuarta y cuinta elementara se dá jö cun la tematica dla forza. La novité é che la revista pó ince gní lita online
»Birba« é la revista dedicada ai scolars y ales scolares de cuarta y cuinta elementara. Sëgn de jügn vëgnel fora la otava ediziun, che se presentëia cun na particolarité: ara vëgn ince metüda online, ci che an ó bona­mënter ince tigní tl dagní. Iló póra gní lita da scolares y scolars, mo sambëgn ince dai geniturs y dal publich interessé.

Cater lingac
Chësc numer de »Birba« se dá jö cun le tema dla forza, olache al vëgn tut en conscidraziun sot a plü aspec sides la forza fisica che la forza mentala o ince la forza d’orenté.
Insciö él da ciafé sön les prömes plates, tl dizionar visif, de vigni sort de parores che á da nen fá cun le tema: la forza de gravité, alzé pëisc y tröc d’atri ejëmpli. Döt ti cater lingac ladin, talian, todësch y ince por inglesc – dal momënt che tla 4. classa mët man i scolars da imparé ince chësc lingaz.

Dai dërc dles ëres ala forza dla natöra: tröpes tematiches
Inant vëgn traté temesc sciöche la zentrala idroeletrica da Balsan, la forza fisicala, i tiers plü stersc dl monn, la forza muscolara y l’importanza dles calories por nosta forza corporala, la forza dla natöra y ince le »Frauen Power«, la forza dles ëres – ó dí i dërc dles ëres y sües forzes combatives. Al ne mancia nia intervistes a n verdabosch y a n fisioterapist, che cunta de tan de forza che an adora da fá chisc laurs. Eserzizi, jüc y esperimënc completëia l’oferta didatica y ludica de Birba.

Les ilustradësses de MarameoLab, Maddalena Aliprandi, Manuela Dasser y Alice Dell’Antonio, á indó ilustré plata por plata cun tröpa fantasia y dediziun. I tröc corusc y i dessëgns, adatá por mitans y mituns da scora, ti dá tröpa vivazité ala revista. I links por podëi desćiarié y ciaré online Birba#8 é da ciafé sön www.pedagogich.it