La Usc di Ladins

Le Minister dla Talia Boccia á anunzié la "liberté de zircolaziun zënza condiziuns". Al é n limo important tla "Fasa 2" de lochernamënt dla stlüta rigorosa piada ia de merz tla Talia. De fat él sëgn conzedü da se möie danter la Talia y i Statesc dl’UE, la Gran Bretagna, l’Irlanda y Monaco. Mo ma dal punt d’odüda dla Talia infora, ajache vigni Stat pé avëi d’atres regoles y n’atra sort de "confins".

L'Austria

L’Austria arferará ia endoman jöbia i controi de confin y de sanité dl vers de Germania, Liechtenstein, Svizera, Slovachia, Slovenia, Republica Ceca y Ungaria. Sön chisc confins pón jí inant y zoruch, y l’Austria ne damanará plü degüna carantena o tests anticoronavirus a chi che vëgn ite. La Talia n’é nia pro i Statesc fortuná, mo an debat chisc dis da conzede finalmënter ezeziuns por provinzies y regiuns che á cuotes de infeziun de coronavirus basses (sciöche Südtirol). Passé tres diretamënter l’Austria pó düc!

La Germania

La Germania dijará i dis che vëgn olache sü zitadins ne sará nia al prigo da jí en vacanza dai 15 de jügn 2020 inant y podará gní derevers zënza messëi jí en carantena.

Controi y registraziun

Al gnará controlé inant jënt y mesi de trasport y mobilité. Por les ferates interregionales y les "frecce" él preodü le control dla temperatöra söla frunt. Por jí cun l’auto da na regiun al’atra él bun sce an é "familiars" o "convivënc", ajache zënza pól ma senté sö l’autist/ta y n/na passajier/a tl siz doía söl’atra pert dl volann, chisc dui cun le mascherot indos. Les porsones gnará registrades te restoranc y hotí.

Nia ciamó "baji" y "abrac", nia abinada de porsones

Le destanziamënt de 1 meter danter porsones nia convivëntes alaleria vel inant. Te na mëndra destanza vál debojëgn de n mascherot. Por jí a cumpré ite, te bars, te botëghes, yii., vélel inant les restriziuns che i sun bele ausá da tigní ite (altamo te Südtirol) da plü tëmp. Por jí ales mësses (sides daite co alaleria), te ferates y ti autobusc él dovëi de mascherot.  (Iaco Rigo)