La Usc di Ladins

La era stata enaudèda ai 13 de dezember passà, con chela de restèr fora enscin ai 13 de oril, la esposizion temporana del Museo Diozesan dal titol »L’invenzione del colpevole. Il ‘caso’ di Simonino da Trento, dalla propaganda alla storia«. Na mostra che met dant n fat storich che à segnà per beleche 500 egn la zità de Trent ma che, tel percors rencurà da la diretora del Museo Diozesan Domenica Primerano, la ne sporc aspec e temes de riflescion che va sorafora l lech e l temp. Defat, jan dò al fil de la storia, la ne moscia che le »fake news« no l’é demò roba de ades e la met al luster i mecanismes che ne porta a se lascèr condizionèr, ence zenza voler e en bona fé,  da la propaganda.

L’esposizion é stata rencurèda da Primerano ensema con n staff de esperc, con la colaborazion del professor de storia medievala Emanele Curzel, de l’Archivie Diozesan, la Fondazion Museo Storich del Trentin, l’Arzidiozesa, l Comun, la Provinzia e l’Università de Trent e la Fondazion Caritro. 

La é stata serèda per l lockdown, desche dut l rest, de mèrz, ma ai 2 de jugn l’à endò orì si ujes, con la bela neva che la podarà restèr fora enscin ai 15 de setember. Per dut l meis de jugn la sarà averta, ensema con duta la sales del Museo Diozesan e con duc i protocoi de prevenzion pervedui, dal mercol a la domenia, da la does domesdì a les ot da sera.


Lejé l'articol entriech su la Usc nr 22 stampèda ai 5 de jugn  (Lucia Gross)