La Usc di Ladins

L’é na neva de gran impat, chela enjignèda per ge dèr l benvegnù a la jent che chisc dis l’à endò podù tachèr a jir ite tel Museo Ladin de Fascia, se sà ben con duta la precauzions e la regoles sanitères aldò.

Te la sala dedichèda a la modernità, su l’ultim partiment, l’é stat metù defat n gran parei video, na instalazion multimedièla da olache i vijitadores vegn chiamé a descorir con marevea na contìa veiora e i pel ruèr ite te la più arcaica tradizion de Fascia, fata de sons, inomes e divinitèdes misteriouses.

Sul parei vegn moscià na lingia de chèdres de pitores fascegn, che dapò i se viventea e da l’esposizion se fèsc lèrga n bosch, da olache ciuta fora na vivèna, che envìa a veder n filmat. 

Na postazion permet de cerner l filmat e la verscion, che pel esser per talian, ladin o coi sot titoi per ingleis, e pel vegnir metù a la leta ence de etres video, desche per ejempie chel de la Cianzon de Val de Fascia. Ma la gran neva l’é »La Vivana e l cian«, n filmat nasciù da na contìa tradizionèla veiora,olachecon l’aiut de la moderna tecnologìes audiovisives e del spirit creatif de artisć, compositores e atores de anchecondì,ciapa endò vita la eterna sugestions del mit.

L filmat se sera sù con na lingia de operes ispirèdes a la vivènes del zipiador de Gherdena Filip Moroder Doss e con la cianties di Marascogn, per meter al luster l fat che la tradizion à ispirà e ispira amò anchecondì n muie de artisć. A chesta vida na contìa veiora troa sie dret post te la sala de la modernità, pissèda apontin fin dal scomenz per valorisèr la produzion creativa ladina d’aldidanché, vejin al gran retrat che moscia la interpretazion de n’autra veia contìa, »La mort e la meseria«, realisèda ti egn passé da l’artista Althea Thauberger.

Con chesta scomenzadiva l’Istitut ladin vel dèr sie contribut a didèr dò la vita sozièla restèda ceta enscin ades e ence l’atività del setor turistich, spervajo che te Fascia desche utró l’é debesegn de tegnir sù soraldut la cultura, l’identità e la calità de l’oferta che n teritorie esclusif desche chel nosc l met a la leta di vijitadores. 

Spetan de pontèr via dassen con la sajon del turism, endèna l staff del Museo l ge sporc l’envit soraldut a la jent de Fascia de jir a veder la neva instalazion, e se sà ben ence duta l’autra sales del Museo, olache l’é semper vèlch da descorir.

Per dut l meis de jugn se podarà jir ite al priesc spezièl de 1,00 euro, aldò de la scomenzadiva touta sù dal sistem museal trentin.

La persones enteressèdes a condivider chesta esperienza les podarà se prenotèr per tor pèrt a la vijites vidèdes che a scomenzèr da en lunesc ai 15 les vegnarà endrezèdes per gropes de 8 persones, aldò de oraries che vegnarà fac a saer e tel pien respet de la normes de segureza pervedudes per l’azess del publich. 

L prum ghest che varearà la sèva del Museo Ladin te na vijita individuèla l ciaparà en don na copia del volum prestigious Cultura materiale, religiosità e tradizioni in Val di Fassa, publicà da Priuli & Verlucca, co la bela fotografìes de Francesco Gioana. Per apuntamenc se pel chiamèr te Museo al numer 0462 760182.


Lejé l'aprofondiment su la Usc nr 23 stampèda ai 12 de jugn  (Lucia Gross)