La Usc di Ladins

Les scores de musiga dl Südtirol á bele da n pez na plata internet, che á atira ciafé aprijamënt por süa buna strotöra y sü contegnüs, tan che ara é gnüda premiada cun le pest "Eccellenza Web 2019". Tl pröm êra indere jüda online ma por talian y todësch – le ladin manciâ. Chësta locia é sëgn gnüda curida y da püch é jüda online ince la verjiun ladina. Sön la plata ciafon dötes les informaziuns d’öga sön les scores de musiga todësces y ladines, sciöche ince dla scora de musiga taliana: i stromënc y les materies che vëgn insigná, le personal insegnant y tröp d’ater. Lapró él ince na seziun dedicada ala musiga popolara.