La Usc di Ladins

I nes recordun düc che la Maratona dles Dolomites dal tema "Ert" á iniann messü gní desdita por gauja dl "coronavirus". O dit atramënter, an l’á sburlada al ater ann, plü avisa ai 4 de messé 2021. Chi che ê gnüs trac fora por iniann á ciafé la opziun da confermé por l’ann che vëgn. Sëgn che an sá tanc che á confermé, pó le comité dla Maratona mëte a desposiziun i posć ciamó lëdi. Di 9.000 partezipanc che á lerch da tó pert, vëgnel ma plü metü a desposiziun 600 posć. Chisc pón porvé da arjunje te trëi manires:

- preiscriziun online sön le sít www.maratona.it danter i 14 d’otober y i 4 de novëmber 2020. Tla secunda pert de novëmber gnarál trat ala niza;
- cumpré n pachet de vacanza (almanco 4 nöts) cun iscriziun garantida, ci che vëgn gestí y venü da incö ai 12 d’otober inant sön le sit dl tour operator ofizial Holimites - www.holimites.com;
- iscriziuns de benefiziënza che gnará venüdes ma online sön le sit dla Maratona ai 24 de ma 2021. Infos plü menüdes al link http://www.maratona.it/it/iscrizioni-di-beneficenza-2021

Sambëgn ne sán sëgn nia co che la situaziun sará ai 4 de messé 2021, mo le comité dla Maratona ó ester otimist, y s’arjigna n iade ca, tla speranza che la opera de "Ert" pois gní completada.  (pablo)