La Usc di Ladins

Tles ultimes 24 ores án registré tl Südtirol 781 infeziuns nöies da coronavirus, sön 2.998 tampons. Bele le de denant n’êl sté 774. Le druch söi ospedai vëgn tres maiú. Ti reparc normai vëgnel medié 303 paziënc, che é 28 deplü co le de denant. Tles cliniches privates él 95 paziënc (+9), tla terapia intensiva n’él 39 (+3) y tles döes strotöres Covid de Gossensass y Sarns él indöt 110 porsones (+3=

I caji tla Ladinia
Ince ti comuns ladins vëgn i caji tres deplü. Do i 16 caji che ê gnüs pormez inier, n’él tles ultimes 24 ores indó 13 deplü: 2 tl comun de Badia, 1 tl comun de Corvara, 3 tl comun de Mareo, 2 tl comun da San Martin, 4 tl comun de Urtijëi y 1 tl comun de Santa Cristina.

Porsones atualmënter positives tla Ladinia
Corvara 6 (1 caje nü)
Badia 12 (2 caji nüs)
La Val 10 (0 caji nüs)
San Martin 15 (2 caji nüs)
Mareo 19 (3 caji nüs)
Urtijëi 17 (4 caji nüs)
Santa Cristina 7 (1 caje nü)
Sëlva 4 (0 caji nüs)

Primat püch plajor
Intratan vëgn tres deplü les usc che Südtirol gnará deplëgn raiun cöce, mo la comunicaziun ofiziala n’é nia ciamó gnüda. Ci che é bele fis, é che la provinzia de Balsan é "la piec dla Talia" cun les infeziuns nöies. Dai 31 d'otober ai 7 de novëmber él sté n aumënti di caji dl 47,28%. Chësc nes posizionëia al pröm post tla Talia, pro chësta classifica püch plajora.


 (pablo)