La Usc di Ladins

Por gauja dl "coronavirus" tomarál fora iniann ince les beles festes de San Martin, olache i mëndri roda fora por paisc cun les linternes. Deplü é les aziuns che inviëia indere da tigní chësta festa a ciasa. Insciö ince la Diozeja de Balsan/Porsenú, che inviëia da impié la linterna vigni sëra dales 18:00, y la mëte fora dan ciasa, sön finestra o sön sorá, cina ai 15 de novëmber. Cun chësta aziun sot al motto "Impëia na löm" ón de un n vers porté l’atenziun sön les porsones che é tl debojëgn y sint te chësc tëmp ciamó deplü la surité, chiló da nos y fora por le monn. De l’ater vers ón ince cherié simboi de liam y de speranza danter la comunité che ne pó n iade nia s’incunté. "Chësta situaziun nes mostra n iade implü tan che i un debojëgn l’un dl ater, che la vita gareta olache i nes incuntun, olache i nes daidun y nes mostrun vijinanza l’un cun l’ater.", dij Johanna Brunner dl Ofize por Matrimone y Familia dla Diozeja.
Valgügn impulsc por chësta aziun y co che an pó festejé San Martin a ciasa, ciafon ince sot ala homepage www.bz-bx.net/martin2020  (pablo)