La Usc di Ladins

La Junta Provinziala de Südtirol á te süa sentada da incö mertesc definí danter l’ater mosöres nöies por jí cuntra le gran numer de infeziuns da coronavirus. Dales 17:00 tignará le presidënt Kompatscher na conferënza stampa sön ci che al é gnü fat fora plü avisa.

Da informaziuns che i un ciafé, restera chëst’edema ciamó sciöche ara é: chël ó dí che les scolines resta davertes, y ince i scolars cina ala pröma mesana podará fá scora en presënza. Döt atramënter spo da en sabeda inant, olache la vita tla provinzia gnará sarada jö en gran pert. Cun l’edema che vëgn sará scores y scolines stlütes; la scora restará ma daverta por mitans y mituns de geniturs che laora ti sorvisc essenziai, sciöche p.ej. le sozial y la sanité.

Tests te vigni comun
Öna dles gran novités sará i tests de massa che gnará fac danter i 20 y i 22 de novëmber. Chiló ón testé tl Südtirol cina a 350.000 porsones (dai 6 agn insö). Te vigni comun gnarál metü sö posć olache la jënt pó jí a fá le test. Co che döt vëgn organisé avisa söl post, messará gní fat fora chisc dis dai comuns deboriada cun la Provinzia y la Sanité. I comuns ará ince le compit da chirí le dër post, organisé la logistica y sambëgn informé sü zitadins. Tó pert al test é volontar, mo al é important che tröpa jënt vais a fá chisc tests. Le travert é da rové al 80% dla popolaziun. I comuns che arjunj la porcentuala, podará cun le lönesc dedó indó jí zoruch a na vita plü morjela; chësc ó dí ala situaziun ch’i un te chësc momënt.

I ves darun plü informaziuns tla ediziun stampada d’La Usc di Ladins  (pablo)