Sion duc nte la medema barca

Data

13 de november 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Comentar de pruma
Nte sti di passai aon pudù vede na gran confujion che la fà da parona nte la gestion de la criji sanitaria che peja semper de pi su l'Italia n frego daperdut. Nte la scola - le Regiogn le vol le sarà, l Ministro no l vol n savè - nte l'economia - degugn vol sarà per paora de no zafié pi a daurì e l é chi che se prova a tignì davart incia contra la lege - o nte la sanità, con na trodena de virologi e dotor de pi sort ogni un che dis la sua cujì che na persona normala no la sa pi a chi i dà rejon. L é chi che domanda mijure pi dure per no fà sciopà i ospedai e la politica che no la vol le le ció per paora de no zafié pi a pèe via co la sarà finida e no zidà de jì incontra a vere e proprie revolte de la jent restada senza laor. Dut chest no l fas auter che complicà ncora de pi la situazion, col resultat che se moltiplica daperdut, incia nte nuos paisc, l numer de chi che, restai senza na direzion prezija, i deventa complotisć, sostenitor de teorie sul virus che no sta né n ziel né su n sta tera per zercé na calche sort de giustificazion o mefo per butà fora la rabia e l nervojo che s'à binà nte sti mesc complicai.
Ma la roba forsi pi sode da vede l é stat l passà da la solidarietà e da la vijinanza de spirito de st'ansuda a sto duc contra duc de st'auton: Stato contra Regiogn, dotor contra complotisć, jent che stà a le regole e se met l mascherot contra chi sonai che i se refuda e i ziga che sion nte na ditatura sanitaria (se vede che no ié mai stai n Cina, sto duorà la parola ditatura a spropojito l é darè a deventà fastidios). Mancia n senso de responsabilità che l faje capì a tante persone che chela che sion darè a vive no l'é na situazion normale e che i comportamenc che ven do­mandai no l é na regole che l governo l se gode a mete per rende la vita impossibile, ma norme che l é nezessario respetà per podè n vignì fora pi n pressa che se pol. Chesta me­dejina l à na saor ria ma no se pol fà de manco de la mandà ju.
No deida che da la politica siebe vignù fora idee ridicole come i banch da scola co le rodele o personagi come l comissario per la sanità de la Calabria Cotticelli che no l sava che i tocava a el mete ju n piano contra l Covid, robe che no i à zerto fat fà na bela figura a chi che avesse da mandà inavant l pais nte la criji pi granda dal 1945 n ca. Ma se chi che governa no i zafia a ester ciari su n chel che l é da fà, toca ai zitadign duorà l bon senso e rinunzié a jí a torjio, a organizà zene coi amizi de scondon, a scampà n massa sa mont come che lé suzedù incia l fin de la stemana passà, se volon sperà de salvà almanco l Nadal e n toch de la sajon de d'invar.
No l é zerto na bela prospetiva chele de autre grosse rinunzie per le stemane che vignarà, ma somea che le devente nezessarie. Parceche sta ota o n vignon fora duc o no n ven fora degugn.  (de Martino Pezzei)

Galaria retrac