View the embedded image gallery online at:
https://www.lausc.it/atualite/13994-ioe-feji-le-test-i-ves-diji-ciodi#sigProId09dd838de2
https://www.lausc.it/atualite/13994-ioe-feji-le-test-i-ves-diji-ciodi#sigProId09dd838de2
Iö vá, ciodí ch’i sun dla convinziun che cun chësta campagna jarára da isolé n gröm de caji positifs, y insciö ince da ti tó jö pëis a nüsc ospedai che vá porsura. Iö vá a fá le test ince sc’i ne sinti nia, deache al ne m’é nia anfat sce doturs y infermieres mëss fá edema por edema ores surafora. I vá a fá le test, deache i oress che les scores y scolines dauriss poscibilmënter bele en lönesc, ince sce al foss ma por val’ edema. I vá deache magari pói contribuí da salvé n toch de sajun da d’invern por chi che se stá cun trica y ó lauré. I vá a fá le test ince cun le risch da messëi sté en carantena zënza me sté mal, deache plü ion stái te ciasa zënza me, co risćé da ti taché le virus a zacai che podess rové te intensif. I vá a fá le test deache i sá che i ne sun nia su sön chësc monn y che en chësc iade pói dé mi contribut zënza fá de gran sforc. I vá a fá le test deache i me pënsi che i dess mostré solidarité defrunt ala coletivité, ince defrunt al berba de 80 agn che ess podü nen vire 85 sce al n’ess nia ciafé le virus, y defrunt a dötes les families che é suramenades o che á familiars te ospedal y ne pó gnanca pormez. Y nia inultima: i vá a fá le test deache i ó finalmënter nen gní fora da chësta situaziun, avisa sciöche düc canc os. I ne sá nia sce chësta campagna é la soluziun, mo i mini che al paies la mëia da porvé. (Pablo Palfrader)