Lingue Morte: vites enchersciores

Data

22 de november 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Na presentaziun marora dla CD nea de "Ensema – Cianzon d’amor e de guera" (Deboriada – Ciances d’amur y de vera) dal grup conesciü de Fascia Lingue Morte. La CD tuta sö tai stüdi de "nontiscordardimè" tol ete musighes de Mario Färber y tesć de Armando Rebaudo
De cösta CD nea él da ciafé sön youtube en videoclip con l’audio original dla ciancia "Spelge" (spidl). Le test de cösta ciancia motü tal ladin mareo é:
Rit. Al n’é nia passé tan (de tomp) che i â endos en ciaz fosch y che i stüdiâ les tabelines, che i jea con mio fre a (trá) sciessores o che i baratâ con Lucia figurines. En per de dis do laurâi te na pensiun, i jea a Balsan a ciaré/ascuté Zappa y ince i Soft Machine con la 500 de chël dal Albergo Posta. Rit.
I jea encërch a trá bala con le chelner de salf y danter bira y vin m’ái rüné con döt chël alcohol che i á ciarcé Rit.
Al n’é nia passé (trep tomp) che i m’á ennamoré y defata m’ái maridé y á motü man da fá sport y da tigní en picio urt, al n’é nia passé tan (de tomp) che i á lascé ester, mo encö m’ái ciaré te spidl y i á odü che i sun gnü vedl, mo encö m’ái ciaré te spidl y i á odü che i sun gnü vedl...
https://www.youtube.com/watch?v=qiedsO4rXGE

Al é sté na bela sorpreja, da ciafé dan dui mënsc con la posta en poch da Armando Rebaudo, leader y coordinadú dal grup Lingue Morte. Lëite êl deplü toc dla CD "Ensema", con na cherta firmada co periâ da ti dé ennant na CD a "Alexander Dal Plan" y a "Hubert y Lucia".

Te plü iadi lunc con l’auto, avisa fora por i Paisc Todësc, olache Armando Rebaudo abitëia (a Offenbach), ái lascé jí la CD, y tres danö passâ les ciancies dan mia mont ia y te mio cör desco recordanzes che i conësci enstës inzai sot o dalunc, d’en monn fat de enfanzia, jonëza, adolescënza, liondes y storia (la Pröma vera y i agn crödi dedó)... Döt vën cunté con referimonc storics y soziai reai, con jont che nos podessun ester, y ince con blëites – deache i jüc alda pla vita. I se odun spo ince enstësc te framonc fora de vita de paisc y de vites de porsones, chës porsones co é en pü’ te vigne paisc, ostaria de munt y generaziun. Val’ cunteja y porsona vëgn ciantada sot en zandl fin de matada y ironia, desco te na encuntada cuotidiana de ostaria te nüsc paisc o te na comedia fata bun.

"Düc deboriada" co vën dant söla CD é: Mario Färber (usc, chitara, vidora), Armando Rebaudo (usc), Roberto Dassala (chiata, usc), Adriano Zanon (clarinet), Enrico Tommasini + Enrico Dassala (bataria), Filippo Chiocchetti (bas), Christine Nones (usc), Stefano Merighi (usc), Cristina Färber + Iris Rebaudo (cor), Lydia Harzer + Anne Müller (vidora), Judith Wilms (violoncelo), Björn Reichert (corn inglesc), Alexandre Bytchov (orghi da man).

Vigne iade che i ascutâ danö la CD asfisćiâi y descorîi facetes nees te cösta y chë ciancia, detais co á na gran emportanza por chi co ó chëie döt dai strumonc spësc y musighes, y dandadöt dai tesć. Y ala fin dla CD romagn vigne iade na ona de encorsciomun: ala jonëza, a personaji che i án sën mancia, ai tomps nia dagnora stés bi mo empó zacó. I án podü i vire y ma con i vire comparësciai endó te chël spidl, olache "i á odü che i sun gnü vedl".

Ara se trata veramonter de na CD fata y dada fora da ciantauturs co é davëi "cuntastories" tal sëns tradizional dla Talia y dai paisc de munt.

Contat con Rebaudo podëise tó sö tres mail: rebaudo@web.de

Söle retrat: la CD nea

(Iaco Rigo)

Galaria retrac