L’apel del Socors da mont: “no ve meté tel pericol!”

Data

18 de jené 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I volontères del CNSAS à cognù jir fora 4 outes demò en domenia per portèr didament a jent en dificoltà. Per chest invern l president Dellantonio propon n’autra vida de jir sa mont.


Fascia la é stata segnada a na vida grieva te l’ultim temp da azidenc sozedui sa mont coi schi. En domenia ai 17 per grazia no l’é stat azidenc mortèi, ampò i volontères del Corp Nazionèl del Socors Alpin e Speleologich del Trentin demò chel dì i à cognù se mobilitèr ben cater outes per jir fora en aiut de jent che se aea troà sa mont en dificoltà: na pruma outa per ge portèr didament a n om da Rorei co la pouses che se à fat mèl a n jeneie sul Lagorai, dapò per n auter trentin che se à fat mèl tel Primier, na terza outa per na femena del Venet tel raion de Folgarìa e en ultima sul Ciadenac, sora l Refuge Principe, olache n’autra femena emiliana se à fat mèl a na giama e l’à cognù vegnir portèda col jolier a l’ospedèl.

Per chest intervent i socorsc é stac chiamé entorn les 5 domesdì dai doi compagnes de escurscion de la femena, l’era jà scur e l’era vent e l’intervent no l’é stat per nia sorì, ma dò aer proà dotrei outes i é stac bogn de calèr con la binda l Tecnich de elisocors vejn a la femena, che é stata stabilisèda. Endèna l jolier l’é jit a Poza a ciarièr doi operatores del socors del Zenter Fascia che dal refuge Vaiolet i à recuperà i doi compagnes che podea vegnir jù con sia giames. La femena é stata enveze portèda con la binda sul jolier ensema al Tecnich de elisocors e portèda a l’ospedèl de Ciavaleis.

Per chest invern l president Dellantonio propon n’autra vida de jir sa mont

Apede a l’empegn, al temp e a la fadìa metui dai volontadives e dai profescionisć del socors, te chest temp de emergenza sanitèra doventa amò più emportant jir sa mont con prudenza e ferstont, per schivèr de meter en dificoltà jent e strutures sanitères jà metudea a dura proa. Per chest l CNSAS à manà fora n video-apel ence sui social per envièr duc a cerner n’autra mont, manco a risech ma semper maraveousa.

“Se cogn aver na gran responsabilità e dezider aldò – disc l president nazionèl del Socors, Maurizio Dellantonio Bandèr da Moena – percheche ogne azident sa mont völ dir più laoro per i sanitares, che i à jà massa da far per via del Covid. Per chest ge domanon ai pascionè de renunziar ai sport pericolosc sa mont. No mencia de segur le alternative, che podesse esser l’ocajion per descuerjer atività, percorsc e lösc manco cognosciui ma ampò maraveosc.”

Tel chèder del projet “Segures sa mont” vigni an tel penultim fin de setemèna de jené l Socors é atif te la prevenzion di azidenc su la neif e chest an la scomenzadiva é dedichèda a medizi, infermieres e personal sanitèr, apontin travers l video, che se pel veder a chest link: https://drive.google.com/drive/folders/1QU4xXiOhH1OPfEfS2eYJc_tlRsxu8fzZ

 (Lucia Gross)