"Lascesse jí tla natöra, ince tl lockdown!"

Data

21 de jené 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Chisc dis él indô n iade tl’aria la probabilité de n lockdown nü. La Ciamena di Mënacrëp y Mënaschi de Südtirol se damana che an pois impó jí fora tla natöra
"Anfat co che n lockdown nü ciara fora: la Ciamena di Mënacrëp y Mënaschi de Südtirol s’aspeta che al restes inant l’azes lëde ala natöra y tles munts, ince sura i confins comunai fora, sambëgn tignon ite les mosöres de sconanza anti Covid." Insciö mët man le comunicat mené fora da mënacrëp y mënaschi ai 21 de jená. Da dí él che cina ciamó unse por fortüna tres podü fora tla natöra, ci che an vëiga ince dala tröpa jënt sö por munt. 
Impó ó mënacrëp y mënaschi jí söl sigü: "Nosta natöra y les munts é pert de nosta identité y n gröm de südtirolesc i anüza por fossené energia fisica y spirituala", dij le presidënt di mënacrëp Kurt Walde. Chësc dess valëi tan deplü te tëmps de limitaziuns, él pö rodunt le movimënt alaleria che pó smendrí le sentimënt da ester sará daite y insciö ince le druch psicologich. "Lapró él na logica scëmpla: plü che an conzentrëia i posć oalche les porsones pó s’armöie, plü alt che al é le prigo da se taché le virus.", dij inant le comunicat.
Rodunt por chësc se damana mënacrëp y mënaschi che al restes ince te n lockdown eventual la poscibilité da s’armöie tla natöra, y chësc ince sura i confins comunai fora. "Vignun é sambëgn instës damané da tigní ite les mosöres de sconanza dal Covid, tigní les destanzes y evité amudlamënc", spliga le presidënt di mënacrëp, che tin deplü sön informaziun y sensibilisaziun: "Che che vá a fá na tour o che vá sön na piza y vëiga bele d’atres porsones, stá dainciará." Cun le dër sentimënt de responsabilité él dër na picia probabilité da se taché le virus tla natöra, dij inant le comunicat, che fej l’apel al govern provinzial: "Prëibel: n’orede nes tó nosc sport o la poscibilité da fá movimënt fisich tla natöra", stlüj jö Walde.  (pablo)