La Usc di Ladins

Martin Cabalzar ova a la fin dl ann 2019 dé ju te mans plu joenes la responsabelté da caporedatour dl foliet rumanc »La Quotidiana« (LQ), y ence l aministradour dla »Agentura da novitads Rumantscha« (ANR) Guido Jörg ova do 22 agn dé ju la responsabelté.
Cabalzar é sté a la pert, dl 1997, da mete en pe chest foliet, l soul cuotidian grijon, y dal 1998 encà él sté l redatour responsabel enfin dl 2019. Al à dit che chest vare é sté per el personalmenter y per LQ dret ideal: la continuité de LQ é vegnuda garantida y an ti deura la porta a forzes nueves tl cheder dla digitalisazion y dla restruturazion di media rumanc. Martin Cabalzar fej inant l jornalist.

La Quotidiana
Chest é l soul foliet rumanc da vigni di. Al é vegnù cherié l ann 1997 da Hanspeter Lebrumet, l editour de »Somedia« da encuei. La redazion dl foliet é vegnuda sostegnuda dassen da la ANR che é dant doi agn vegnuda trata ite tla »Fundaziun Medias Rumantschas« (FMR), la suzessoura de ANR. LQ é le soul foliet cuotidian de lingaz rumanc; ala é gnuda cherieda dl 1997 tres l'integrazion di autri foliec locals: »Gasetta Rumantscha«, »Fögl Ladin«, »Casa Paterna/La Punt« y la »Pagina rumancia La Nova dl Bündner Tagblatt«. La pert redazionala dl foliet interrumanc vegn realiseda da la “Fundaziun Medias Rumantschas", fondeda l ann 2019. Corina Casanova é la sourastanta dla FMR y David Truttmann le caporedatour; la FMR à 11 colaboradours da Mustér a Scuol. Chesta FMR vuel salvé i media rumanc sot n tet ite. 
La Quotidiana reporta emprumadedut cie che sozed y passa tles regions dla Svizra Rumancia y tl Cianton Grijon. Prum redatour de LQ é sté l engiadineis Enrico Kopatz, y dal 1998 encà é la redazion de LQ steda tles mans de Martin Cabalzar. Les notizies locales dles regions rumances vegn normalmenter comunichedes ti 5 idioms (Sursilvan, Sotsilvan, Surmiran, Puter, Valader), les noveles souraregionales vegn scialdi comunichedes tl lingaz grijon unifiché "Rumantsch Grischun". LQ à encuei chi 4.000 abonés y vegn lieta da presciapuech 10.000 persones. La gran pert dl foliet é slargeda fora tla Surselva. Con l projet »Fundaziun Medias Rumantschas« é les scines per l mantegniment y l svilup de LQ sciche foliet de duta la Romania sentedes ite te de bones condizions.

Lois Trebo


Liejede de plu tla edizion stampeda de La Usc di Ladins!