Da le 18 s’à ufizialmente davart n Anpezo la 46° edizione dei Mondiai de schi. Darè na introduzion da banda del cuartet de archi del Quartetto Effe, l ator Francesco Montanari l à tignù n curt monologo ulà che l à regordà come che Cortina la sie deventada n pais cugnessù per le impreje sportive dei granc atlec del schi su le piste de sue mont e che l s’à augurà che sto grant event sportivo l deide a vardà con fiduzia al davignì. Po l é toca al cantante Francesco Gabbani centà la cianzon “Futura” de Lucio Dalla, scrita ntel 1979 intan che l pensava a doi jovegn zarnui dal Mur de Berlino ma che i paricia n davignì auna.
L é stat prejentà i 71 paisc che ciolarà part a le competiziogn, co le bandiere
de duc i stati portade da tosac e maestri de le scole de schi de Anpezo: n ultima l é ruà incia la bandiera taliana e chela de la FIS, portade da carabinieri e finanzier coi schi, e la Banda de Anpezo l à sonà l ino talian. Po l é ruà l momento dei saluc da banda de le istituziogn che à organizà sti Mondiai, l é stat proietà n ejecuzion del
Nessun dorma da la Turandot de Puccini registrà a l’Arena de Verona e l é stat na coreografia da banda de le mascore del Carneval de Venezia per zelebrà Venezia e l liam anter la zità e Anpezo.
N ultima l é ruà sul palco incia Kristian Ghedina che l à prejentà la cantante Gianna Nannini che l à centà doi cianzogn che i à tan piajù, darè da ele n grop de tos e tose vistii a l’anpezana à mostrà sue bele mondure con n balo moderno e a sarà via la serada l é stat n ultima coreografia compagnada dal violinista Andrea Costa: na zerimonia vignuda pulito, co la nef che magari la l à fata deventà pi descomoda ma n frego pi magica.
Martino Pezzei