"Complot" cuntra Alfreider? N articul cun potenzial esplosif

Data

08 de fauré 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
"Fac dër sceri... Nia da crëie che porsones cun funziuns o inciaries publiches fejes para pro de te’ intrighes". Insciö scrí l’assessur Daniel Alfreider te n comunicat, do le "complot" cuntra süa porsona recostruí tla "Neue Südtiroler Tageszeitung"
"Das Alfreider Komplott": chësc é le titul sön la pröma plata dla "Neue Südtiroler Tageszeitung" di 6 y 7 de forá 2021. Ci él pa sozedü? Dan dui agn â le foliet edemanal "FF" publiché na reportaja da chëra che al ti gnô trat dant al neo-assessur ladin Daniel Alfreider iregolarités incër le spostamënt de cubatöres dl lüch a Calfosch. Na storia che ti â porté bindebó de groaries, danter articui ti media y ince intervistes scomotes da pert dla televijiun, y döt chësc rodunt tl tëmp che al ê gnü metü sö la Junta Provinziala nöia, cun Alfreider sciöche assessur ala mobilité. Les inrescides por chësc fat vá inant y al é ciamó da odëi sce l’assessur gnará mené a prozes. Dal articul publiché en sabeda tla "Tageszeitung" vëgnel fora n detail nia da püch: che l’aziun da porté Alfreider dan signoria ê orüda y orchestrada, por le impedí sciöche assessur o le sforzé da dé les dimisciuns. Iadedó n’él nia zacai demanco co le chef dla SAD Ingomar Gatterer, cun informanc ince tl monn ladin. Düc cun inciaries publiches de pëis. Na chestiun che podess avëi conseguënzes ince por les inciaries che les porsones cür, cun dann de imaja por les istituziuns che ai rapresentëia. Chisc fac é pordërt gnüs a löm te döt n ater contest: tratan inrescides incër les conzesciuns por le trasport publich de Südtirol.

La reaziun de Alfreider
L’assessur Daniel Alfreider reagësc sëgn al articul, y "damana tlarëza y stlarimënc sön les informaziuns gnüdes a löm". I reportun chiló le comunicat:
"Le vizepresidënt dla Provinzia Daniel Alfreider damana tlarëza y stlarimënc do les publicaziuns da inier (sabeda, adr) da pert dl foliet "Die Neue Südtiroler Tagesteitung" che á mostré sö n complot organisé cuntra süa porsona. "I fac presentá tl articul dal titul "Das Alfreider-Komplott" é dër sceri y implü n’él nia da crëie che porsones che á funziuns o inciaries publiches fejes para pro de te’ intrighes", dij Alfreider.
Le foliet dla "Neue Südtiroler Tageszeitung" á scrit inier, che n grup incër le chef dla SAD Ingomar Gatterer á porvé da porté dan signoria cun denunzies Daniel Alfreider, cun l’obietif da le porté ales dimisciuns por le mudé fora sciöche assessur cun n assessur, da chël che Gatterer s’ess aspeté de plü cooperaziun pro les conzesciuns dles corieres. Tl articul vëgnel mostré sö avisa sön la basa de protocoi de telefonades, ci aziuns y manipolaziuns che al é gnü fat por rové al travert.
Chësta chestiun mostra ince tan gragn che intersc privac de n valgügn é y tan inant che ai vá, por evité trasparënza y na nöia soluziun inhouse di sorvisc dles corieres. Y chëstes aziuns doia desmostra ince che a valgügn ne ti jôl nia a scüsa, sciöche la Provinzia á porvé da porte ite plü trasparënza tl setur di trasporc, sciöche ince aprové da pert dl Consëi provinzial. Al é demorvëia che val’ de te’ sides poscibl tl Südtirol. Chëstes metodes n’é daldöt nia da azeté y na aziun nia ma cuntra öna na porsona, mo cuntra düc i südtirolesc y les istituziuns publiches.
Alfreider damana che al vëgnes stlarí döta la chestiun te na manira aprofondida, dantadöt por ci che reverda les acüses. "I portará a denunzia chisc comportamënc pro la Procura y dales atres istituziuns competëntes tl setur. Implü dess ince la comisciun de ejaminaziun dl Consëi provinzial traté chësta chestiun", dij Alfreider.
Te chësc caje ne vará insciö nia ma da stravardé na porsona singola, mo ince dla proteziun de chi che rapresentëia istituziuns publiches. Al ne pó nia ester, te degun vers, che al ti vëgnes fat presciun a aministradus publics cun de te’ metodes demorvëia y cun denunzies inscenades a chesta manira."


 (pablo)