La Usc di Ladins

Les scores respidlëia la situaziun de infeziuns dla sozieté. Insciö é ince le numer de infeziuns tles istituziuns scolastiches jü sö tles ultimes edemes. Porchël dessel gní fat plü tests tles scores, por podëi tigní damí la situaziun sot control. Por fá chësc ne bastel nia le personal che é por le momënt en sorvisc. Por fá plü tests che ara vá, tles scores ladines, todësces y talianes de döta la Provinzia, á insciö la Junta provinziala damané la colaboraziun de doturies y doturs, infermieres y infermiers volontars o en ponsiun.

Cun n apel ó i trëi assessurs por la formaziun Daniel Alfreider, Philipp Achammer y Giuliano Vettorato damané la colaboraziun de personal sanitar volontar o en ponsiun: "I adorun, pornanche ara vá, personal spezialisé tl ciamp sanitar por pié ia cun na linia de tesć tles scores altes, mo ince tles elementare y mesanes. I damanun a doturies y doturs, infermieres o infermiers volontars o en ponsiun da se daidé da fá chisc tests sön le post ai scolars y ales scolares". I trëi assessurs é sigüsc: vigni ressursa de tëmp metüda a desposiziun por daidé mituns y jogn da ti garantí l’insegnamënt en presënza, é preziosa.

Les porsones interessades che á les cualifiches profescionales, pó comuniché süa desponibilité  ala Intendënza y cultura ladina: intendenza-ladina@provinzia.bz.it. Al vëgn damané chisc dac: l’inom, la misciun, le numer de telefon o la misciun mail, l’indicaziun dl comun, dla valada o dla scora olache la porsona interessada oress daidé para. Deplü informaziuns gnará spo dades diretamënter ai interesciá, en colaboraziun cun l’aziënda sanitara.