La Usc di Ladins

La i va magra a la scuadra taliana la prima giornada dei mondiai, darè doi di de gare sautade gauja l ruo temp: dadoman, ntel Super-G de le ele 10° pojizion per Federica Brignone, 11° per Marta Bassino, 18° per Elena Curtoni, 23° per Francesca Marsaglia. A vinze l é Lara Gut-Behrami, darè da ela Corinne Suter e Mikaela Shiffrin.

No la va meo per i omegn: 5° Dominik Paris, 13° Emanuele Buzzi, 19° Matteo Marsaglia, 23° Christoph Innerhofer, Mattia Casse inveze l é ju fora intan la gara. I prim trei atlec i é duc jui fora sul medemo saut: a la fin medaia de oro per Vincent Kriechmay, de arjent per Romed Baumann (tiroleje che cor co la Germania), de bronzo per Alexis Pinturault. Davan da la gara dei omegn à fat na passada ntel ziel le Frecce Tricolori, che l prim de marz le farà festa per i 60 agn da canche i é nassude.

Per doman vender ai 12 nia gare n programa, vignarà fate domà le prove de discesa: da le 10:30 per i omegn, da le 13:00 per le ele. Se tornarà a pèe via dassen sabeda 13, co la discesa de le ele da le 11:00 su la pista Olympia e dei omegn da le 13:00 su la nuova pista “Vertigine”.

Martino Pezzei