Südtirol: Scores y scolines stlütes almanco n’edema

Data

18 de fauré 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Te Südtirol él tres ciamó cotan de infeziuns y al é gnü ciafé caji dla varianta "südafricana" dl virus. Chësc porta te döt Südtirol a scores y scolines stlütes, y a regoles ciamó plü strëntes ti cater comuns olache la varianta é gnüda a löm
En mercui ai 17 de forá á le presidënt dla Provinzia Arno Kompatscher dé fora na ordinanza nöia: de un n vers por gauja dl gran numer de infeziuns, dl ater vers por la varianta "südafricana" dl virus ciafada ti cater comuns da Maran, Riffian, Moss te Passeier y St. Pankraz.

Scores y scolines resta stlütes
En domënia se röia les vacanzes da Carlascé, mo les ciases di pici, scolines y scores de vigni degré restará stlütes te döt Südtirol por n iade almanco cina ai 28 de forá. Chësc ó dí che les scores fej la didatica a destanza. Al vëgn garantí n "sorvisc d’emergënza" en presënza, por i mituns de geniturs che laora te ciamps definis "essenziai".

Mosöres por alenamënc sportifs
Da en lönesc vëgnel ince smendrí cotan l’ativité d’alenamënt por les assoziaziuns sportives. S’alené podará ma plü sportifs de profesciun, atlec dla nazionala y partezipanc ai campionac amatoriai nazionai.

Adatamënt dla lista "ATECO" por le comerz al detail
Bele da incö jöbia ai 18 de forá pó indô daurí botëghes de computer y tecnologia dla comunicaziun y dl intratignimënt.

Mosöres dër strëntes por i 4 comuns
Ti cater comuns olache al é gnü a löm la varianta nöia, velel mosöres ciamó plü strëntes. En general él proibí da jí alaleria, cun ezeziun dles rajuns che an conësc: laur, sanité o movimënc de emergënza. Sce an se sposta al intern de chisc comuns, o fora da chisc comuns, mëss sü abitanc podëi mostré sö (olbianza dai 22 de forá inant) n test antigen o PCR negatif, nia plü vedl co 72 ores. Te chisc comuns resta les scores a destanza cina ai 7 de merz, frisers y salons da estetista mëss tigní stlüt cina ai 7 de merz.

La ordinanza nöia pón se desćiarié jö chiló:
http://www.provinz.bz.it/sicherheit-zivilschutz/zivilschutz/coronavirus-downloads-dokumente-zum-herunterladen.asp?publ_cate_id=22328





 (pablo)