La Usc di Ladins

Les iscriziuns é davertes söl portal dl Imperial College London, le proiet pëia ia cun merz 2021 y vëgn mené inant dala sozieté/organisaziun hVIVO che stüdia i virus y antivirus, y l’efiziënza söl corp umann.
I volontars che tol pert al stüde sará a desposiziun di scienziá por n ann alalungia, ai se isolará canche al vá debojëgn, ai se lasciará controlé y vijité tres indó, a ciasa y ti labors. Ai ciafará paié por fá i "probandi" – o dit miú "porsones de esperimënt" – indöt zirca 4.700,00 euro.
Aladó di dac atuai pél che "ma" 1 sön 10.000 jogn danter 20 y 29 agn ais n risch de mort por Covid–19, y che chësc dat cares canche le paziënt vëgn monitoré adaldërt dai doturs.
I reportun ci che la plata ofiziala "Human Challenge Model" scri: "hVIVO á fat – cina sëgn – 50 proiec de inrescida cun 3.000 volontars, anuzan virus de influënza... I orun adoré chësc model ince por daidé do le svilup de vazins y cures anti Covid–19."
Tan normala che la vita di "pobandi" sará por chësta spana de tëmp aisciöda 2021 – aisciöda 2022 ne sá ciamó degügn da dí. A vigni manira podessel gní a löm respostes avisa sön co che le virus s’astila tl corp umann, co che al se multiplichëia y co che al se spann fora tl’aria y infetëia d’atra jënt.

 (Iaco Rigo)