Tesć ince te scores elementares ladines

Data

02 de merz 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tles scores elementares d'Al Plan, La Val y Urtijëi metaran man ti proscims dis – sciöche te d'atres scores elementares dl Süditirol – da fá tesć asvelc
Te deplü scores elementares dl Sütirol metaran man chis dis da fá tesć asvelc. L'obietif é chël da garantí la continuité dl insegnamënt en presënza. Tl pröm gnará i tesć fac ma te n valgönes scores, mo an oress spo i porté ite te dötes les elementares dla Provinzia y plü inant ince tles scores mesanes y altes. 

Tesć che i scolars se fej instësc
I tesć asvelc che gnará fac tles scores elementares é tesć nia invasifs che i scolars pó se fá instësc: »Le test él vigni scolar che se fej da su, jon cun n bachët de bambesc sö por le nes, sot le control de n insegnant",  nes spliga l'intendënta dles scores ladines Edith Ploner. I insegnanc che messará controlé sciöche i scolars y les scolares fej le test é gnüs informá y insigná jö tres Webinars y al é ince gnü arjigné n video che spliga te na manira dër scëmpla sciöche i tesć funzionëia. Le video, che é gnü realisé dala Aziënda Sanitara dl Südtirol, pón odëi a chësc link https://youtu.be/UxPxv3cfK7M.

Al Plan, La Val y Urtijëi mët man
»Südtirol á tut sciöche ejëmpl l'Austria, olache chisc tesć vëgn bele fac cun de bugn resultac – dij inant l'intendënta che alza spo fora che ara se trata sambëgn ma de n »pre-screening«, chël ó di che sce n test resultëia positif, mëss le scolar o la scolara fá le test PCR che confermará sce ara se trata de infeziun da coronavirus o no. Te n pröm momënt – por ci che reverda les scores ladines – gnarál testé tles scores elementares d'Al Plan, La Val y Urtijëi. »I scomenciun da fá i tesć ti proscims dis, bunamënter en jöbia, mo i messun aspeté che i tesć röies adalerch dal'Olanda. Denanco pié ia saral spo ince ciamó da damané l'autorisaziun ai geniturs«, dij inant Edith Ploner che sotrissëia sciöche chësta sides na buna oportunité por ne messëi nia plü riscé da saré les scores, cun dötes les problematiches por les families che na stlüta comporta: »Al é na gran organisaziun iadedô, mo i messun fá döt le poscibl por afronté chësta emergënza sanitara y por garantí che les leziuns pois gní fates en presënza«, stlüj jö l'intendënta.  (kp)