La Usc di Ladins

L’é passà 10 egn da canche, de otober del 2011, tel chèder del XV dombrament generèl de la popolazion de la Tèlia, l’é stat metù a jir l’ultima outa la rilevazion di sentadins che fèsc pèrt de la comunanzes ladin, mochena e cimbra, descheche l’é pervedù dal Decret Legislatif 592 del 1993. Endèna l’é mudà ence l sistem del dombrament de la popolazion a livel nazionèl fat da l’ISTAT, che no l vegn più endrezà vigni 10 egn tel medemo moment per duc i sentadins che stèsc sul tegnir de la Tèlia, ma ades l vegn fat a na vida desferenta, a dò e dò e a roda ti desvalives teritories.

Ampò tel Trentin cogn semper vegnir metù a jir la rilevazion del numer, de la dislocazion teritoriala e de la situazion soziolinguistica de ladins, mochegn e zimbres, ajache chest l’é pervedù da la Lege Provinzièla nr 6 del 2008 su la mendranzes linguistiches, ence con l’obietif de valutèr e miorèr la percacenza de la politiches de stravardament, valorisazion e svilup de la trei mendranzes. 

La medema lege 6 perveit ence che sui contegnui e la modalitèdes de chesta rilevazion cogne esser l’intesa de la Conferenza de la Mendranzes, e apontin per chest  i componenc é stac chiamé a tor pèrt a la XXXII Conferenza, ruan a na proponeta condividuda dò na scontrèda politica e tecnica chiamèda ite te Comun general de Fascia dal procuradir Giuseppe Detomas.

De più su La Usc stampèda de vender ai 26 de mèrz.   (Lucia Gross)