Ai 2 de oril regolave de brun!

Data

01 de auril 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tel Dì de sensibilisazion su l’autism l Comun general envìa duc a tor consaputa de chest problem. L’ent l’é dò chierir de fèr rei e de orir ence te Fascia n Portel Autism

L’Assemblea de la Nazions Unides del 2007 l’à dezidù de dedichèr ogne an la giornèda di 2 de oril a la consaputa su l’autism e l’à cernù l brun desche color simbol de chesta condizion che tol ite n numer semper maor de persones.

Per chest l color brun caraterisarà, en vender ai 2 de oril, l Comun General e i Comuns de Fascia che i à cernù de tor sù l’envit de l’ONU de portèr inant azions de sensibilisazion sui besegnes de la persones con autism e de sia families.

Olache l’é l met de l fèr, i frabicac publics vegnarà enlumené con chest color, e duc i sentadins vegn envié te chest dì a se regolèr de brun. L’é n picol segn per envièr duc a pissèr a chel che vel dir viver con l’autism e a recordèr che vèlch outa bèsta ence de picola robes per fèr stèr miec chi che aon entornvia. N segn de vejinanza per i bec e i joegn, la families e la fegures profescionèles che dì per dì les à a che fèr con chest mond. 

L’é benfat recordèr che l’autism no l’é na malatia, l’é na condizion che interferesc sui raporc e la relazions sozièles, su la comunicazion e la pel dèr problemes per l lengaz e l comportament. L’é donca vèlch che tocia desvalives aspec e ogne persona con autism l’à carateristiches desferentes e uniches.   

La Comun general de Fascia l se à ativà per veder se l’é l met de averjer te nosc teritorie, con l coinvolgiment de la Scola Ladina, n Portel Autism, lech de didament organisatif-educatif e didatich per i scolees e i studenc con autism. Chest permetessa dapò de fèr pèrt de la rei nazionèla di Portie Autism de la Tèlia.

Apede chest l Comun general à jà dat la desponibilità per na colaborazion percacenta con AGSAT (la Sociazion di genitores de sogec autistics del Tretin) che laora da egn con competenza e profescionalità per l ben di bec e de sia families.

Dut chest con la consaputa che la creazion de na rei e la colaborazion  anter servijes, istituzions e familiea podarà ge dèr n sostegn e n aiut concret a chi che vif chesta condizion senestra.  (LG)