La Usc di Ladins

Na persona y na personalité empor­tanta y de gran valenza per la vita culturala y politica ladina nes à lascé! Tratant sia linia de enciaries politiches a livel regional, provinzial y comunal, y cheles culturales – chestes ultimes dutes sun basa de volontariat – àl combatù na vita alalongia con amor y pascion, con convinzion y ardiment per i derc di Ladins, che gonot é vegnus strités ju o ignorés dala politica (p.ej. sentenza dla court costituzionala nr. 356 di 21.10.1998, conesciuda propi con l inom de »sentenza Willeit«).
Al é sté n om respeté cotant dan­taldut per sies competen­zes, sia gran preparazion y si savei giuridich-aministratif, souraldut te chestions de nostra mendranza ladina, ma ence per sia coerenza, seriosité y artenienza tl desfilament de sie laour che al à metù a la leta per stravardé i interesc di Ladins, per ti garantì ai Ladins na majera raprejentanza politica y canche ala se tratova da combate per na majera y mioura sconanza di Ladins.
Per la Union Generela di Ladins dla Dolomites él sté na figura essenziala n iade tl manejament dles ativités culturales, sun cheles che al tigniva pa feter, canche al fova president (1983-86) y ence ti agn dedò, desche vizepresident (ideadour dl Festival di Cors di mutons »Cianta con nos«, 1987), dlongia la presidenta da enlaouta Ilda Pizzinini, che al stimova dret, y spo enfin su per chisc ultims agn per sie sostegn prezious y sovenz fondamental tles chestions giuridiches che la Union Generela à abù da desgropé.
I vue ence recordé i trueps articui y contribuc de valuta che Carlo à reporté per dejenes alalongia te nost foliet La Usc di Ladins, sensibilisan enscì i letours sun les chestions ladines y ti giaurian nia dinrer i uedli en cont di derc sofoiés y dles ghiranzes che ti speta ai Ladins.
A Carlo ti stajòvel a cuer che la cultura ladina ne vegnisse nia strenta ite a n blot folclorism, y for endò sotrissòvel la valenza politica di Ladins, sie dert de partezipazion ativa te dutes les istituzions y te duc i gremiums politics.
L dr. Willeit nes lascia n bon ensegnament y valours emportanc che restarà ti temps: empruma chel de ne zede nia y jì »inant adum« desche Ladinia entiera, con snait y creta, a defene nosc derc y lascé audì lonc y lerch nostes ghiranzes.
I vue scluje ju con les paroles fora dla laudatio de Hubert Dalponte en gaujion dla nominazion a president de onour dla UGLD l ann 2017: »Carlo, per dut chel che t'as fat y dé a la comunanza ladina, a tia tera ladina, per chel che t'as arjont, ma dantaldut per chel che te raprejenteies tres ciamò ...« te sonse reconescenc y te dijon n gran iolan!  (de Milva Mussner, presidenta dla Union Generela di Ladins dla Dolomites)