La Usc di Ladins

Por i Jus de Frara, dl Sela, de Ciaulunch y Pordú él les Provinzies de Balsan, de Trënt y de Belun y la Regiun Venet che á lauré fora n conzet de mobilité sostenibla y suraregionala adöm cun i Comuns de Corvara, Sëlva, Cianacëi y Fodom. Tl zënter dl conzet él la sostenibilité. La Junta provinziala á aprové incö (13 de aurí) la proposta dl assessur por la mobilité Daniel Alfreider sön n protocol de acordanza. Tl protocol vëgnel planifiché n management dla mobilité tres sistems integrá, cun la poscibilité da monitoré y manajé le trafich söi jus y cun le fin da smendrí l’ajiamënt acustich y ambiental y ti dé insciö plü valur a döt le raiun dles Dolomites, che toca ince pro le patrimone natural mondial UNESCO.

I

• Sön Ju de Frara. (Foto: Angelika Schrott/osp)
•  

View the embedded image gallery online at:
https://www.lausc.it/atualite/15375-jus-dles-dolomites-memorandum-suraregional-por-la-mobilite#sigProIded8a75fd24

fins prinzipai é cualité de vita, sconanza dl ambiënt y evënc sostenibli tles Dolomites
Düc i contignüs dl "Memorandum of Understanding" dla mobilité fej referimënt a protocoi universai por la sostenibilité y la sconanza dl ambiënt. Aladô dl "Green Deal" dessel gní sostigní söi jus na viabilité cun mesi de mobilité che ne ajiëia nia, por smendrí les emisciuns tl raiun dles Dolomites. N obietif é ince da mëte sö punc de coliamënt danter la mobilité publica y privata. En general dessel gní smendrí la presënza de auti y motors söi jus y tles localités tles vijinanzes. "I obietifs prinzipai é da mioré la cualité de vita dles porsones söl post, da sconé la natöra straordinara dles Dolomites y da cherié formes de mobilité sostenibla por s’armöie te chësc raiun", dij Alfreider.

Colaboraziun politica por mëte en pe deboriada n management dla mobilité
Le "Memorandum of Understanding" por la mobilité é n segnal politich important, deache aladô de Alfreider él nezesciar che düc fejes para pro n management dla mobilité söi jus y por coordiné les mosöres danter Venet, Trënt y Südtirol. Por arjunje chësc obietif él düc i partners che laurará por istalé na organisaziun suraregionala por cherié n plan plurianual dla mobilité y por evalué les mosöres y i dac dl trafich. Al ne gnará nia ma ejaminé la sort de veicui söi jus, mo ince la frecuënza y l’intensité. Por monitoré chëstes variables él gnü istalé 12 staziuns de monitoring.

Mosöres sö de plü liví y te plü vari
Tl procol vëgnel stabilí che i partezipanc mëtes en pratica mosöres asveltes ti agn 2021 y 2022 por na mobilité plü ativa, sciöche por ejëmpl da aumenté le numer de iadi dl trasport publich, da colié tres na cherta i mesi de trasport y da fá mosöres de sensibilisaziun y comunicaziun. Implü dessel ince gní lauré sön mosöres söles strades por i agn 2023 y 2024. Al é planifiché perts de strades nöies por les rodes y de plü plazes da parché tles valades por lascé jö i auti. Implü vëgnel definí les poscibilités iuridiches y tecniches por regolamenté le trafich söi jus, sciöche ince da cherié na staziun unica de informaziun di dac söl trafich, por avëi n management digital unitar. Chisc vari dess gní acompagná da domandes do n cofinanziamënt europeich de chëstes mosöres.

I partezipanc laurará fora ti proscims 60 dis n plan de mosöres por dui agn, cun mosöres plü detaiades por i proscims sis mëisc. Le "Memorandum of Understanding" á na dorada de dui agn y pó gní arlungé.  (osp)