La Usc di Ladins

La repartiziun provinziala dl’aministraziun patrimoniala fistidiëia al momënt dla proprieté de 26 üties da munt. Por alisiré le refornimënt, vëgnel sëgn valuté la poscibilité da joré sö le patüc cun drones. Por ciafé na idea de co che chësc sorvisc dess funzioné, é l’assessur provinzial Massimo Bessone rové a Natz/Schabs tla sënta dla firma spezialisada Flying Basket: "I valutun tresfora soluziuns inovatives por nostes üties da munt. Rodunt por chësc nes dunse jö cun le refornimënt dles üties tres n sistem de trasport nü cun drones", spliga Bessone. Chësc proiet pilot podess contribuí da smendrí les emisciuns de CO2, la vera y cun le tëmp ince les spëises, scrí la Provinzia te n comunicat. La convinziun dl assessur é che les drones daidass respet al joler da tigní basc i cosć y impormetess da reforní les üties cun produc frësć y regionai.
Le diretur de repartiziun Daniel Bedin spliga che chësta poscibilité nöia gnará valutada deboriada cun i manajadus dles üties da munt, cun chi che an chir la colaboraziun. Les drones impormetess da condü a munt n pëis cina 100 chili.