La Usc di Ladins

En mèrtesc ai 22 de jugn l conseier provinzièl del grop Fassa Luca Guglielmi à portà dant n dessegn de lege che revèrda l trasport con elicoter per prum socors. 

Amò ai 8 de oril de chest an l conseier aea portà dant na interogazion te Consei provinzièl per saer se l’é vera che canche vegn chiamà l’elicoter de l’Aiut Alpin Dolomites la Provinzia de Trent cogn ge paèr 140 euro al menut a la Provinzia de Busan e che enveze la Provinzia de Busan ge recognosc a l’Aiut Alpin Dolomites 62,42 euro al menut. L president de la Provinzia Maurizio Fugatti à confermà la speisa, dachelanvìa l conseier Guglielmi à prejentà l dessegn de lege, nasciù ence da la volontà de ge dèr ousc ai teritories più dalonc da Trent olache ponta via duc i elecoteres.

La proponeta legislativa de Guglielmi perveit de mudèr la lege provinzièla nr 9 dal prum de messèl del 2011 e la lege provinzièla nr 16 dai 23 de messèl del 2010. 

Se trata de integrazions che prezisa la possibilità che la Provinzia de Trent, per garantir la mior oferta de prum socors sanitèr sun dut l tegnir provinzièl, sotscrive cordanzes e convenzions per i sgoi de elicoter con etres enc publics, organisazions de volontariat, consorzies de organisazions de prum socors, sociazions e enc privac tel respet di prinzipies de sparagn e efizienza. Chest dessegn de lege disciplina no demò la possibilità ma soraldut la prezisa volontà, che ades é perveduda demò da diretives dirigenziales che disc che ogne intervent cogn vegnir concordà con la Provinzia de Busan.

L’é chest n auter provediment che va te la direzion de na maor autonomia de la Provinzia de Trent, ma soraldut de maor segureza ence sanitèra, per i teritories dalonc ma fondamentèi dal pont de veduda ence turistich desche Fascia e Primier.