La Usc di Ladins

L’é stat na festa tel segn de la repartenza chela de en domenia ai 27 de jugn sun Contrin. Passa 500 partezipanc, anter alpins e sostegnidores, à tout pèrt a la 38^ radunanza de la Sociazion Nazionèla di Alpins. Dò 16 meisc de clausura e de distanza, che à anulà ence la Radunanza Nazionèla del 2020, l’é stat n bel moment per se troèr endondanef e per recordèr chi che à lascià chesta tera endèna la pandemìa, enceben che la jent stente amò a jir fora e se à vedù manco partezipazion di etres egn inant del Covid. Ence n bel grop de Alpins de Fascia se à troà sun Contrin, valgugn é jic a pe da la val de Sèn Nicolò e i se à fat na bela raida su per nesc monc. 

La zerimonia se à avert con l’in di Alpins sonà da la Fanfara de Lizzana che à compagnà l labaro de la sociazion. Sobito dò la autoritèdes ge à portà onor al monument de Arturo Andreoletti, ofizial di Alpins, stat anter i fondadores de l’Ana. L’é mort del 1977 de passa 90 egn e belapontin sun Contrin ge é stat dedicà n monument, per chest la utia l’é doventà »cèsa di Alpins«.

Anter la autoritèdes l’era i presidenc Ana nazionèl e privinzièl Sebastiano Favero e Paolo Frizzi, l president de la Provinzia de Trent Maurizio Fugatti, la senatora Elena Testor e l’ombolt de Sèn Jan Giulio Florian.

De più su La Usc stampèda de vender ai 2 de messèl 2021.   (mci)