La Usc di Ladins

Da passa trei meisc a Sèn Jan, te la palestra de la scola mesènes, l’é stat endrezà n pont per fèr i vazins che l’é atif vigni sabeda e domenia e che vegn manà inant demò de gra a la desponiboltà di volontères, de sociazions desche la Crousc Checena, i Studafech, l Socors da mont e de sanitères (infermieres o dotores) en atività o en penscion che se met a la leta debant tel fin de setemèna.

Vigni week end vegn encalmà presciapech 450 persones: jent del post ma ence jent de Fiem che preferesc vegnir a Sèn Jan ajache i fèsc più sorì tel fin de setemèna, jent che à sentù che l’endrez l’é dassen ezelent e te nience mes’ora (touc ite ence i 15 menuc che se cogn spetèr per precauzion dò l vazin) l’é dut fat, e ades ence lurieranc o ghesć che vegn da fora e che stèsc te Fascia a fèr sajon o feries longes.

L besegn l’é amò gran: se se vel pissèr de poder ge fèr front no demò a la sajon da d’istà, ma ence a chela da d’invern che vegnarà, ge vel che amò n muie de noscia jent, de operatores del turism de noscia valèdes, se fae spervaji a se fèr l vazin. Chest vegn dit a gran ousc dai sanitères, dai dotores e ence da la responsabola del servije infermieristich de Fascia, Lucia Dellagiacoma.

Ampò, ades che con la sajon e l trafich se tramudèr fin fora Ciavaleis doventa per duc amò più senester, l pont di vazins de Sèn Jan l’é a risech, e chest ajache – descheche la medema d.ra Dellagiacoma deschiaresc te na letra – se capesc che l’Azienda Sanitèra de Trent no à mai vedù de bon eie l fat che tel distret de Fascia, l soul olache no l’era stat pervedù l pont per i vazins, pissan de manèr duc fora Ciavaleis, se sie stac bogn de se endrezèr amò enstesc per portèr inant n servije tant prezious. 

Ades che col vegnir inant de la sajon turistica l’é semper più senester poder arsegurèr la desponibilità de duc i volontadives che serf, vigni fin de setemèna, per arsegurèr l servije fat delvers, per jir inant servissa dalbon che l’APSS dae na desmostrazion concreta de sostegn, acioche duc i proclames su la volontà de ge jir encontra ai sentadins per smaorèr l numer de encalmé no reste demò sul papier.

Duta la letra e de autra informazions é da poder lejer su La Usc stampèda de vender ai 9 de messèl.  (Lucia Gross)