La Usc di Ladins

Per tor pèrt a evenc sportives, de teater, culturai e de chino, che i sie daite o defora, l Green pass no l’é obligatorie, ma l pel vegnir domanà da gestores e organisadores se i vel aer più partezipazion respet ai limic stabelii a livel nazionèl.

La spezifica é ruèda angern, en mèrtesc ai 6 de messèl, te na neva ordenanza interpretativa sotescrita dal president de la Provinzia de Trent Maurizio Fugatti. A chesta vida vegn deschiarì i contegnui de la norma nr 77 manèda fora en vender ai 2 de messèl olache vegnia dit che per tor pèrt a evenc daite ge volea la prenotazions di posć, la zertificazion verda Covid-19 (Green pass) o n tampon negatif con valuta de 48 ores.

Na ordenanza che à soscedà cruzies e polemiches, vegnuda fora canche oramai i Comitac manifestazions se à jà endrezà con sie calandèr de evenc e soraldut veduda da n muie de operatores del setor del spetacol e de strutures desche i chino, desche n empediment a sia atività. Na cincantina de Comuns de la Provinzia à uzà fora sia protesta tras na letra manèda al president Fugatti per ge domanèr che vegne tout via l’oblianza del Green pass.

»L’atenzion da pèrt de l’Aministrazion provinzièla resta mascima ti confronc di setores che à particolamenter padì la restrizion per l contegniment de la pandemia – à dit i assessores a la cultura Mirko Bisesti e al sport e turism Roberto Failoni. Per chesta rejon la Provinzia enten garantir la possibilità de tor pèrt a spetacoi e evenc sul teritorie descheche vegn pervedù da la linees vida nazionèles, ma ence de garantir na maor partezipazion col Green pass, na oportunità en più per la repartenza de chisc setore.«

En pratega per i evenc sportives, tant daite che defora, l’azess é consentì demò fin al 25% de la capienza mascima consentida (fin a 500 persones daite e fin a 1.000 defora), col Green pass se pel ruèr fin al 50% e vegn tout via l limit mascim. Per l’autra sort de spetacoi, tant daite che defora, zenza Green pass i spetadores pel ruèr fin al 50% di posć desponiboi (fin a 500 persones daite e 1.000 a l’averta) enveze con la zertificazion vegn tout demez l numer mascim de spetadores.  (mci)