L musizist Enrico Tommasini, ensema a la sociazion La Grenz, à endrezà sie conzerc de musega catalana, furlana, romancia e ladina. Da sera enconter con i artisć.
La Musega di Joegn de Mendranza l’é la protagonista ence chest istà de la rassegna JMMJ. Na rassegna voluda da Enrico Tommasini, ensema con la sociazion »La Grenz«, che ti egn l’à abù l met de cognoscer e ge dèr lèrga te la senta de Moena e ti teatres de la doi valèdes a artisć che fèsc pèrt de mendranzes linguistiches. Chesta rassegna ti egn passé é stata dalbon aprijièda per la calità di gropes che fèsc sia ejibizions te ciantons da marevea e per chest ence chest istà l musizist Tommasini à endrezà n calandèr de valuta. Sie conzerc da no perder che metarà al luster l’aut livel musical di gropes e la doura creativa e contemporana de si lengac: catalan, furlan, romanc e ladin.
La rassegna JMMJ, Joegn de
Mendranza e Musega Jazz, vegn endrezèda col sostegn de la Cassa Rurala Dolomites, l Comun general de Fascia, la Region Trentin-Sudtirol, la Provinzia de Trent, l Comun de Moena e la sozietà de impianc portamont Ciadenac. I conzerc vegn endrezé da les 11.00 inantmesdì e da sera da les 21.00 a La Grenz de Moena se pel tor pèrt ai encontres coi artisć. Per prenotazions ge vel scriver a
infolagrenz@gmail.com.Se taca en domenia ai 18 de messèl sun Ciampedie con i ghesć spezièi Fabrizio Bosso & Julian Oliver Mazzariello »Tandem«. Fabrizio a la tombra e Julian al pianofort con gran sintonia i ge dèsc lèrga a sia ledeza espressiva con standard USA, cianzon de la Tèlia, Brasil, temes de film, ballad che ciapa ite l publich te na emozion da no desmentièr.
L program perveit dapò te lesc desferenc la ciantarina de Mareo Anita Obwegs e dapò Ursina, romancia dal Grijons, Jemm Musical Project con Max Castlunger, i Drumlanduo dal Friul e Claudia Crabuzza, catalana de Sardegna da l’Alguer.
De più su La Usc stampèda de vender ai 9 de messèl.
