La Usc di Ladins

L’à inom Ursina Giger e la vegn dal Cianton svizer di Grijons, olache i rejona romanc, n lengaz jorman del ladin. Ursina é nasciuda te na picola vila anter i monc svizeres e ades la stèsc a Turic (Zurigo). Prest se podarà scutèr ence te Fascia sie repertorie, che se à formà te n univers musical refinà, che à tout sù elemenc da la musega classica, dal folk, dal pop e da la cianties populères te sie lengaz mère.

Ursina la tegnarà sie conzert en vender ai 30 de messèl tel chèder del projet JMMJ (Joegn de mendranza e Musega Jazz) endrezà da la sociazion La Grenz de Moena con a cef Enrico Tommasini, col sostegn del Comun General de Fascia, de la Region Trentin Sudtirol, de la Provinzia de Trent e amò del Comun de Moena de la Cassa Rurala Dolomites e de la sozietà de impianc portamont Catinaccio. 

L’apuntament l’é sun Costabela, sun Sèn Pelegrin, olache da les 11 da doman la sarà compagnèda da Vojko Huter a la chitara, Florian Egli al bas e Maxime Paratte a la bateria.

Desche per ogne auter apuntamet con JMMJ l medemo dì, da les 9 da sera, la sarà a La Grenz, te Strada Saslonch a Moena, per la jam session.

En vender ai 6 de aost l program metarà dant enveze l Jemm Musical Project, che tol ite l badiot Max Castlunger: ic sonarà te Fuciada.  (lg)