La Usc di Ladins

Le presidënt de Arton y colaboradú de chësta racoiüda de musizistes y musizisć de Südtirol che vir tla diaspora spera da podëi concretisé finalmënter d’altonn l’idea piada ia dan n ann y mez: "La ligrëza da se conforté a chisc pröms apuntamënc é grana, i sperun che nosc proiet pois garaté, do che le monn cultural s’á indó daurí." La coordinadëssa dla organisaziun dla gran abinada y di conzerc, Cornelia Goller, alza fora le plusvalur dla colaboraziun, dantadöt por ci che reverda les ciases por podëi porté dant i conzerc: le zënter cultural Euregio Gustav Mahler a Toblach, la Fondaziun dl Teater de cité a Balsan y l’Auditorium provinzial sciöche ince le Teater de cité a Maran y la Kurhaus.
Les dates por i conzerc é fissades, le program é metü: Johann Rufinatscha, ouverture te c-moll; Igor Stravinsky, "Der Feuervogel", suite 1919; Antonín Dvořák - sinfonia Nr. 9 te e-moll "Aus der neuen Welt", op. 95. Le dirighënt Michael Pichler é entusiast dl repertore, dantadöt por le toch debut dl componist südtirolesc Johann Rufinatscha.
L’idea dla "Südtirol Filarmonica" é nasciüda ala fin dl 2019 a Porsenú. Les musizistes y i musizisć vëgn fora n pü’ da dötes les valades, baia deplü lingac. Indöt n’él 64 al momënt, chëstes y chisc dess gní cherdá y inviá adalerch por mëte en pe l’orchestra y pité i pröms conzerc.

Cumpré km

L’assoziaziun mëna do pro i apascioná de musiga da cumpré km (sön la plata internet suedtirol-filarmonica.it) por paié i jori y iadi dles musizistes y di musizisć. Indöt fej fora i iadi por gní adalerch 67.183 km. I iadi plü dainciará é la Florida y Malaysia. N km costa 1 euro por chi che ó daidé. Por che porsones de Südtirol, jüdes altró a realisé so som y talënt dla musiga, se abines indó n iade adöm: por s’la cunté, mo dantadöt por fá ci che i á cherdá fora por le monn: la bela musiga.  (Iaco Rigo)