La Usc di Ladins

L C.N.C.A, l Coordenament Nazionèl Comunanza de Azet, endreza dai 25 de setember ai 3 de otober la setemèna de l’acolienza. Chest an l argoment l é »Da comunità che sostengono a comunità sostenibili« e l envit che l é stat uzà fora l é chel de rejonèr su la costion ambientèla a livel generèl ma ence de fèr na analisa sun nesc comportamenc e soraldut sun nesc raporc con l ambient e coi lesc olache vivon. La sezion regionèla del C.N.C.A. à slarià fora l envit a tor pèrt a la setemèna del azet ence ai teritories e te Fascia l Comun general à tout su con gaissa la proponeta. 

»L titol che ge aon dat a chesta scomenzadiva – à dit la conseiera de procura del Comun general Mirella Florian – l é ‘Per l valor de mia tera – cognoscenza, formazion e neva idees’ e con chest volon sotrissar che nosc raion l à n valor e volon l stravardar. Via per la setemana, che te Fascia tacarà ite ai 27 de setember, se podarà tor part a desvalives apuntamenc ouc ai gregn e ence ai bec de la scola che podarà tor su neves contegnui e vegnarà segur fora neva idees per meter a jir sistemes virtuousc che dassen i podarà miorar nosc viver. Canche se rejona de costion ambientala se peissa sobito al entesseament, al consum de le ressorse, al sciudament global e se podessa se pissar che che i à a che far i problemes del ambient con la setemana del azet. No se pel desmentiar che duc i problemes ambientai – à amò dit Florian – é leé ence a costion de giustizia soziala, de meseria percheche canche sozet valch dejaster l é la jent che stasc piec che padesc i dans maores. Donca cognon chierir de mudar le relazion e i raporc che aon con l ambient e dachelanvia ence con la jent, se volon che duc vive miec, e se cogn troar modie percacenc che ne deide a presservar l ecosistem.

L program
En lunesc ai 27 de setember da les 14.30 al Bar educant a Sèn Jan: »Dolomites: patrimonie de l’umanità e patrimonie de la comunità« e da les 20.30 te Oratorie de Poza: »Laudato Sì. Letra enciclica de Papa Francesch su la cura de la cèsa comuna«.
En mèrtesc ai 28 da les 17.00 al Bar educant: »Na esperienza de turism sozièl te Fascia: la cèsa per ferie Le Rais«.
En mercol ai 29 da les 20.30 te Oratorie de Poza: »L turism sostegnibol desche prospetiva e oportunità. L cajo di teritories Dolomites Unesco«.
En jebia ai 30 da les 17.00 al Bar educant: prejentazion del Distret de Economia solidala de Fascia e Fiem e da les 20.30 te sala grana de la Scola de Fascia: »La endesfides che met dant i mudamenc climatics e la crisa ecologica: caujes, conseguenzes e strategies possiboles«.
En vender prum de otober da les 16.00 al Bar educant a Sèn Jan: »Saores de noscia tera« con degustazions de prodoc locai.
En sabeda ai 2 da les 15.00 al Bar educant a Sèn Jan: N projet per la recalificazion urbanistica e ambientèla del scito de Masia.