La Usc di Ladins

L se à serà su ofizialmenter enstadì a Trent l projet european ECCA (European Charter Classroom Activities) che era stat envià via del 2019 per ge fèr cognoscer ai joegn la Chèrta europeèna per i lengac regionèi e de mendranza, endrezan ativitèdes te clas e engaissan la fradaa anter studenc e ensegnanc. L projet era nasciù tel chèder del NPLD, la rei europeèna per la promozion de la desvalivanza linguistica che l à cofinanzià, e l é stat portà inant dal Comun general de Fascia col coordenament de Sabrina Rasom, enlouta responsabola di Servijes linguistics del CGF, che la é ence vizepresidenta del NPLD.

Chest projet à tout ite 5 comunanzes de mendranza con università, na ventina de scoles e passa n centené de joegn. Apede ai ladins con la Scola de Fascia l era la mendranza furlèna con l’Agenzia regionèla per l lengaz furlan ARLeF, l’Università de Udin e la scoles de Tumieç, Glemone e S. Denêl; chela frisona con la Provinzia di Fryslân e Afûk (Olanda); chela unghereisa (magyar) de la Romania con la Partium Christian University e chela catalana col grop de atenees Xarxa Vives d’Universitats.

Te la scoles de chisc 5 gropes linguistics n muie de bec anter i 11 e i 16 egn à abù l met de studièr e cognoscer la Chèrta europeèna per i lengac regionèi e de mendranza e i deric de la popolazions che rejona picoi lengac e che sent de aer na identità particolèra.

En vender prum de otober, te la »sala delle Marangonerie« del Ciastel del Buonconsiglio,  col sostegn de la Provinzia de Trent e del Servije Mendranzes Linguistiches l é stat metù a jir n convegn con esponenc de duta 5 la mendranzes linguistiches che à tout pèrt al projet, per fèr mingol de bilanz e per veder coche i obietives metui dant pel vegnir porté inant tel davegnir.

Al convegn à tout pèrt ence trei studenc fascegn, venjidores del concors per la produzion de video sul tem de la percezion de lengaz e identità da man di joegn, anché e tel davegnir.

I video di studenc e duc i materiai enjigné é da poder veder ence su <thisismylanguage.eu>, la piata web del projet ECCA scrita ti 5 lengac de la mendranzes che à tout pèrt, olache se pel saer de più sui contegnui de la scomenzadiva e su la ativitèdes del ECCA.

De più su La Usc stampèda de vender ai 8 de otober 2021.  (Lucia Gross)