Transdolomites chiama, l minister Giovannini respon

Data

13 de otober 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Massimo Girardi ge à manà na letra a Enrico Giovannini, minister de la infrastrutures e de la mobilità sostegnibola su la costion de la ferata e de na neva mobilità te la Dolomites.

Ai prumes de setember l president de la sociazion Transdolomites Massimo Girardi ge à manà na letra al minister de la infrastrutures e de la mobilità sostegnibola Enrico Giovannini en cont de la ferata e de na neva mobilità te la Dolomites.

La reflescions proponetes tel document les à uzà l’atenzion su la streches de ferata che tel raion dolomitich é states desmetudes do la seconda vera. Desmiscions che à roinà l met de ruèr te la destinazions turistiches tras la ferata – disc Girardi - coscì i residenc se à spostà semper de più coi mesi su goma e te la valèdes l trafich privat l é semper de più n fator de decadiment de la calità de la vita e de l’oferta turistica; l’oferta de mobilità publica su goma enveze, ence se renforzèda te chisc egn, l à gran dificoltèdes a arsegurèr n servije percacent. 

Canche la ferata de la galaria del Prener sarà vertia, se vedarà amò de più la mencianzes di servijes de la mobilità publica. Se se speta che da chel 10% che dora la ferata per ruèr te noscia region se passe al 30% e fosc ence al 40% - va inant l president - i studies fac te la Tèlia e te l’UE moscia che tel davegnir i teritories turistics olache se pel ruar con la ferata sarà la destinazions più domanèdes.

La letra à ence metù al luster l besegn de pissèr a la creazion de na rei de ferata provinzièla tel Trentin, che à da vegnir conscidrà n tassel emportant de dut l projet european e de studièr fora l coleament anter la valèdes per tachèr ensema la maor realtèdes del teritorie e miorèr la soridanza de azes al Prener: n aspet de gran atualità anchecondì – disc Girardi - per renforzèr l’integrazion e l svilup equilibrà de la valèdes, con na atenzion particolèra al azes ai lesc turistics.

Per chest Transdolomites à envià l Minister Giovannini a intervegnir al convegn che Transdolomites metarà a jir al Muse ai 28 de otober del 2021, con raprejentanc de Svizra, Austria, Comiscion Europeèna, Colege Enjegneres Taliegn e n grop de relatores tecnics taliegn. Al convegn l é stat envià ence l president Maurizio Fugatti e l assessor al turism Roberto Failoni.

La responeta del minister Giovannini é ruèda pec dis do – deschiaresc Girardi - l minister no podarà tor pèrt per empegnes jà touc ma l à dat encèria a l raprejentèr a un di responsaboi del Minister de la Infrastrutures. Na atenzion che onora noscia sociazion, fata da sentadins scempies sostegnui da profescionisć del setor de la mobilità publica e de la ferata.

De più su La Usc stampèda de vender ai 8 de otober.