La Usc di Ladins

Por jí a un di 15 marciá da Nadé che sará en chësta ota indô tl Tirol dl Süd (i gragn y tradizionai resta chi a Balsan, Maran, Porsenú, Sterzing y Bornech che se desfirará dai 26 de novëmber ai 6 de jená 2022) ól ester le pass vërt che vel. Chësc á fat fora ai 2 de novëmber 2021 la Junta provinziala.
Les regoles vel por i cin' marciá tradizionai tles cités y ince por i atri mëndri marciá cun plü co cin’ üties.
I ghesć di marciá gnará controlá y passará tres n check–point. Vignöna y vignun che vá a marcé y é por storje pro ciafará na morona da brac por n de intier. Por chi che passa ma dlungiaía zënza cumpré y consumé val’ él preodü n passaje. I controi söl pass vërt gnará fac ince daite dl areal dl marcé y pro les üties che dá fora spëisa y boanda.

Jones y jogn che vá ales proes

Na novité á en chësc de la Junta provinziala delibré en cunt dles scolares y di scolars, resp. dles studëntes y di studënc, che á da jí a proa de Cor, Musiga y d’atres uniuns de paisc. Chëstes jones y chisc jogn ne mëss nia plü presenté le resultat de n test fat aposta por jí a proa, al vel ince le resultat dl test fat a scora.