La Usc di Ladins

Do se aer prejentà a la comunitèdes mochena e zimbra, la neva Autorità per la mendranzes linguistiches é ruèda te Fascia. En vender ai 29 de otober la presidenta fascèna Katia Vasselai ensema con Chiara Pallaoro de la mendranza mochena e a Matteo Nicolussi Castellan zimber, i à chiamà ite i raprejentanc de la maor istituzions fascènes per na scontrèda te Istitut cultural ladin.
A la scontrèda à tout pèrt ence la senatora Elena Testor, l conseier provinzièl ladin Luca Guglielmi e l president del Consei provinzièl Walter Kaswalder che à prejentà i trei neves membres de l’Autorità desche trei persones joenes, esprescion del teritorie che se à metù a la leta con gran entusiasm. Do l salut de la presidenta del Istitut cultural ladin Lara Battisti l é stat l moment de la prejentazions.  

»Desche Autorità chieriron semper de favorir la coejion anter duc i sogec che se cruzia de mendranzes ajache ogneun l é fondamental – à dit la presidenta Vasselai. Sion chiò no demò per se prejentar ma per ve dir che luraron per la defendura de la mendranza ladina, per chest volon crear raporc direc, ence demò tras na telefonada. Se daron ju per la atuazion concreta de la normativa e per verificar coche vegn durà le ressorse economiche.«
Coejion e colaborazion donca per envièr e portèr inant n lurier percacent.

Per prum a tor la parola l é stat l procurador del Comun general de Fascia Giuseppe Detomas che à metù sobito sun desch na costion de gran emportanza per l ent medemo e per la mendranza. »L Comun general l é l strument per ezelenza de defendura de la mendranza linguistica – à dit Detomas – e dal 2017 con la neva lege costituzionala l é recognosciù dal Statut de Autonomia desche n ent aministratif autonom, na realtà istituzionala unica tel ordenament talian, ma mencia amò la norma de aplicazion ajache Provinzia e Region no ge à amò dat su nesciuna funzion. L Comun general de Fascia l é n ent che à gran potenzialità, ge vel che Trent l lo recognosce e l lo valorisee e che l ge passe le funzion su la pianificazion teritoriala, sul turism e su le infrastruture.«
L é stat rejonà al lonch de scola con l intervent del Sorastant Federico Corradini che à uzà fora l’autonomia de la istituzion e fon e rich l é stat l intervent del president de l’Union di Ladins de Fascia Fernando Brunel che à metù dant desvaliva costions.

De più su La Usc stampèda de vender ai 5 de november.

 (Monica Cigolla)