La Usc di Ladins

Dan otedé á la Junta provinziala dé süa aproaziun al "bonus-IT" por le personal dles scores y scolines. Chësta mosöra prevëiga la poscibilité da ciafé zoruch sciöche retüda de na spëisa fata por la cumpra de produc de hard- y/o software che taca adöm cun l’insegnamënt a destanza tratan la perioda dl coronavirus. La spana de tëmp de cumpra di produc é gnüda stabilida dai 5 de merz dl 2020 cina ai 15 de novëmber dl 2021 – chël ó dí che al é ciamó sëgn adorassá da fistidié dla cumpra. Do l’aproaziun da pert dla Junta provinziala él sté les trëi direziuns scolastiches che á lauré fora adöm ala "Südtiroler Informatik AG (SIAG)" le sorvisc online por fá les domandes.
Cina sëgn él gnü dé jö 2270 domandes, de chëstes 1788 pro le Departimënt Scora todëscia, 415 pro le Departimënt Scora taliana y 45 pro ll'Intëndenza y Cultura ladina. Por fá domanda por chi che laora tl sistem scolastich ladin prëibel cliché sön
https://www.provinzia.bz.it/formaziun-lingac/scora-ladina/la/comunicac-scora-ladina.asp?news_action=4&news_article_id=660888

Regoles tleres por fá domanda
Les regoles por fá domanda é trasparëntes – dij la Provinzia. Al é meso da fá domanda sce le cunt dla cumpra di produc de soft- o hardware é gnü intesté ala porsona che fej domanda o sce al é gnü tut ca le cunt bancar che an á adöm al partner de matrimone. Ince le paiamënt en contanc vëgn conscidré, mo ma ti caji che la cubita é gnü intestada ala porsona che fej domanda o sce an pó desmostré che le paiamënt é gnü fat tres le cunt dl insegnant/dla insegnanta.
An pó ciamó fá domanda cina ai 16 de novëmber tres le sorvisc online. Dötes les informaziuns nezesciares söi vari da fá por dé jö la domanda pon ciafé söi sic dles repartiziuns dla scora todëscia y taliana.