La Usc di Ladins

Coluna él la situazion te Fascia per chel che vèrda l sistem de l’educazion e de la formazion, e colugn él i provedimenc che fossa benfat tor per miorèr i servijes te chest setor?

A chesta domanes respon l Pian per l’organisazion del servije educatif ladin de Fascia, che l é pervedù da la Lege provinzièla nr 5 dai 7 de aost del 2006 sul sistem educatif de istruzion e formazion del Trentin.

Chesta lege ge resserva n titol a la desposizions spezièles per la mendranzes linguistiches sul tegnir provinzièl e al art. 46 la met dant la istituzion del Consei general per l’educazion e la formazion (CGEF) de Fascia, che anter sia encèries l à apontin chela de aproèr l Pian. Chest document cogn troèr fora i obietives educatives e i besegnes economics e sozièi del teritorie, e la mesures de razionalisazion de la perferida de la Scola de Fascia, tegnan cont de chi per l stravardament e l svilup del lengaz ladin.

Apontin ai 3 de november l CGEF à aproà l Pian per l’organisazion del servije educatif ladin de Fascia, e se trata de n passaje de gran emportanza, ence se mencia amò n vèrech, ajache ades l Pian é stat manà te Provinzia a Trent olache i à 45 dis de temp per l vardèr fora e portèr dant en cajo sia osservazions. Ampò de segur n gran zil é stat arjont, con la sodesfazion de la presidenta de chest Consei, la ensegnanta Roberta Dellantonio, e di etres componenc, che i l à aproà duc a una.

De più su La Usc stampèda de vender ai 12 de november.  (Lucia Gross)