La Usc di Ladins

Che velel dir mobilità sostegnibola? Segur no vel dir fèr su de neva strèdes ma alincontra troèr de neva vides de se spostèr che smendre l impat ambientèl, sozièl e economich che porta l auto privat. L’azion concreta per na mobilità sostegnibola stèsc enveze te la promozion e l endrez de intervenc finalisé a sostegnir na mobilità alternativa: a pe, con la roda, coi mesi de trasport publich e per ultim con i mesi de trasport privat condividui (car pooling e car sharing).

L ponta via da chisc aspec Massimo Girardi, president de la sociazion Transdolomites, per fèr sia riflescions dintornvia l turism e la mobilità de la Dolomites e per verjer l debatit al publich e Transdolomites à endrezà na scontrèda publica en jebia ai 18 de november da les 17:00 te sala de Consei de Comun de Sèn Jan. Tolarà pèrt Massimo Girardi, president de Transdolomites; Helmuth Moroder, stat diretor de la STA (Infrastrutures de ferata del Sudtirol che gestesc la ferata Maran-Malles); Diego Cason, espert de soziologia del turism e de la pianificazion teritorièla; Giorgio Daidola, dozent del Departiment de economia e management de l’Università de Trent; Giovanni Saccà che à slarià fora l studie de la Facoltà de Economia de l’Università de Verona su la ipotesa de percors de la ferata de la Veisc. 

La conferenza vegnarà moscèda ence en direta streaming su la piata Facebook de Transdolomites al link https://fb.me/e/2WjFAilaF.